Лічба ахвяраў страляніны ў будынку філасофскага факультэту Карлавага ўніверсітэту ў чэшскай Празе ўзрасла да 15 асобаў. Яшчэ 24 атрымалі раненні. Пра гэта паведаміў начальнік паліцыі Марцін Вондрашэк, піша «Seznam Zprávy».
Ён таксама пацвердзіў, што нападнік мог скончыць жыццё самагубствам, паведамляе Novinky.cz. Паводле Вондрашэка, паміж паліцыянтамі і нападнікам адбылася перастрэлка
«Паліцыя таксама ўжывала зброю, але мяркуючы па траўмах, якія мы змаглі ўбачыць на ім, выглядае, што ён наклаў на сябе рукі», – сказаў начальнік паліцыі.
Ён дадаў, што асоба нападніка пакуль афіцыйна не пацверджаная, бо той атрымаў цяжкую траўму, якая магло быць вынікам стрэлу з блізкай адлегласці.
Ніхто з супрацоўнікаў паліцыі ці іншых экстраных службаў не пацярпеў.
21 снежня ў будынку факультэту мастацтваў Карлава ўніверсітэту ў Празе, што на плошчы Яна Палаха ў чэшскай сталіцы, адбылася страляніна.
«Пачалося ўсё гэта на чацвёртым паверсе будынку філасофскага факультэту ўніверсітэту. Вось мае аднагрупнікі знаходзіліся на лекцыі на той момант на трэцім паверсе, яны забарыкадаваліся. Людзей эвакуявалі з будынку, хтосьці ўвогуле ратаваўся праз дах», – распавёў «Белсату» магістрант Станіслаў Рудкоўскі, чые аднагрупнікі ў момант нападу былі ў будынку.
Нападнікам мог быць 24-гадовы студэнт Давід Козак, які атрымаў ступень бакалаўра гісторыі і еўрапейскіх даследаванняў, а затым працягнуў атрыманне ступені магістра гісторыі. Яго звязваюць з яшчэ адным забойствам у гэты дзень.
Якуб Хруст belsat.eu