Дэпартамент авіяцыі Беларусі адказаў на ініцыятыву Еўразвязу дадаць у пяты пакет санкцыяў супраць афіцыйнага Менску жорсткія абмежаванні адносна кампаніі «Белавія». У прыватнасці Брусель прапрацоўвае магчымасць забараніць абслугоўванне самалётаў «Белавіі», набытых у лізінг. Гэтыя захады прапаноўваюцца ў якасці рэакцыі на датычнасць «Белавіі» да арганізацыі міграцыйнага крызісу ў ЕЗ.
У Менску абвінавачанне ў датычнасці «Белавіі» да міграцыйнага крызісу пракаментавалі ў Дэпартаменце авіяцыі.
«Для развязання міграцыйнага пытання ЕЗ можа прыняць пастанову ў зацвярджэнні пераліку асобных дзяржаваў, грамадзянам якіх будзе забаронена перамяшчацца рэйсамі авіякампаніяў, што выконваюць палёты ў Беларусь.
Дэпартамент авіяцыі ў сваю чаргу абавязваецца апублікаваць гэты пералік для публічнага выкарыстання і рэалізоўваць гэтае рашэнне ЕЗ», – гаворыцца ў паведамленні БелТА.
18 кастрычніка кіраўнік МЗС Нямеччыны Гайка Маас распавёў, што ЕЗ працягне змагацца з авіякампаніямі, што бяруць удзел у перавозе ўцекачоў да межаў еўрапейскіх краінаў. ЕЗ разглядае ўвядзенне санкцыяў супраць турыстычных кампаніяў, а таксама накладанне поўных санкцыяў на нацыянальную беларускую авіякампанію «Белавія».
АА belsat.eu
