Людзей з адпаведнымі навыкамі і зброяй плануюць выкарыстоўваць у якасці «снайперскага прыкрыцця».
Паляўнічыя пры неабходнасці могуць быць задзеяныя ў тэрытарыяльнай абароне, заявіў у эфіры ОНТ старшыня Беларускага таварыства паляўнічых і рыбаловаў Ігар Шуневіч.
«Разглядаецца магчымасць выкарыстання нашых ведаў і навыкаў, у тым ліку экіпавання, тэхнікі, зброі ў інтарэсах тэрытарыяльнай абароны», – сказаў ён, удакладніўшы, што гаворка не пра апалчэнне, а «больш спецыялізаванае воінскае фармаванне».
Гаворачы пра тое, чым менавіта паляўнічыя могуць там спатрэбіцца, Шуневіч акрэсліў даволі шырокае кола заданняў:
«І ў першую чаргу, вядома ж, у маім разуменні, якое адпавядае разуменню вайсковага кіраўніцтва дзяржавы, – гэта выкарыстанне паляўнічых у якасці магчымага снайперскага прыкрыцця. Гэта таксама можа быць ахова аб’ектаў, адбіццё нападаў дыверсійна-разведвальных групаў і гэтак далей».
Шуневіч удакладніў, што на руках у беларусаў – каля 100 тысячаў адзінак паляўнічай зброі.
Нагадаем: на мінулым тыдні па выніках дакладу Аляксандру Лукашэнку Шуневіч заявіў, што паляўнічыя ўвойдуць у апалчэнне са сваёй зброяй. Апалчэнцамі стануць тыя, каго не прызавуць у войска падчас мабілізацыі:
«Паляўнічыя, не прызваныя на службу ў парадку, вызначаным ваенкаматамі, безумоўна, возьмуць удзел у любых дзеяннях, неабходных для абароны дзяржавы. Выкарыстоўваючы і свае навыкі, і экіпаванне, і зброю. Пра гэта таксама мы сёння гаварылі. Тут выключэнняў не будзе ніякіх. Кожны, хто валодае зброяй, разумее, што павінен будзе бараніць. Чым бараніць – ёсць. Астатняе дашліфуем».
Раней дзяржаўны сакратар Савету бяспекі Аляксандр Вальфовіч расказаў, што з сябе ўяўляе тэрытарыяльная абарона: тэрытарыяльныя войскі – гэта структурнае падраздзяленне, прызванае праз ваенкамат, забяспечанае вайсковаю ўніформай і зброяй, жыць будзе не ўдома, а ў тым месцы, дзе вызначыць штаб раёну тэрытарыяльнай абароны або штабзона тэрытарыяльнай абароны. Тэрытарыяльныя войскі могуць быць адпраўленыя на дзяржаўную мяжу або ахоўваць важныя абʼекты.
СП, belsat.eu
