«Расея і «Хамас» падобныя». Кіраўніца Еўракамісіі заклікала спыніць «гэтую заразу»
Кіраўніца Еўракамісіі Урзуля фон дэр Ляен таксама паставіла ў адзін шэраг ісламісцкі рух «Хамас» і ўлады Расеі. Пра гэта яна заявіла, выступаючы ў амерыканскім Інстытуце Гадсана, які ў Расеі абвесцілі непажаданай арганізацыяй.
«Расея і «Хамас» падобныя. Як сказаў прэзідэнт Зяленскі, іх сутнасць адна. І адны, і другія забівалі і бралі ў закладнікі нявінных мірных жыхароў, у тым ліку немаўлятаў і дзяцей. Гэта варварскі спосаб барацьбы. І калі гэтай заразы не спыніць, яна можа распаўсюдзіцца з Еўропы на Блізкі Усход і ў Індыйска-Ціхаакіянскі рэгіён», – заявіла Урзуля фон дэр Ляен.
Прэзідэнт ЗША Джо Байдэн увечары 19 кастрычніка выступіў з тэлезваротам да суграмадзянаў, у якім патлумачыў, чаму просіць Кангрэс вылучыць мільярды долараў на дапамогу Ізраілю і Украіне. Сярод іншага ён выступіў і з падобным параўнаннем уладаў Расеі ды «Хамасу»:
«Мы не можам дапусціць і не дапусцім, каб такія тэрарысты, як «Хамас», і такія тыраны, як Пуцін, перамаглі».
На думку Джо Байдэна, і «Хамас», і Пуцін хочуць знішчыць суседнюю дэмакратычную краіну, і менавіта гэтага Злучаныя Штаты мусяць не дапусціць, бо надалей ёсць вялікаю нацыяй ды маяком свабоды і дэмакратыі для ўсяго свету.
Якуб Хруст belsat.eu
