У Днепрапятроўскай вобласці абстралялі жылы сектар. Ёсць забітыя, сярод параненых – дзеці
У ноч на 20 ліпеня расейскія войскі абстралялі жылы квартал у горадзе Нікапаль на Днепрапятроўшчыне. Двое забітыя і яшчэ дзевяць параненыя, у тым ліку маленькія дзеці, паведамляе кіраўнік абласной ваеннай адміністрацыі рэгіёну Валянцін Рэзнічэнка.
Шасцёра пацярпелых застаюцца ў шпіталі, сярод іх чацвёра дзяцей. Малодшаму ўсяго тры гады.
Па горадзе выпусцілі больш за 30 снарадаў з «Градаў». Цалкам разбураныя тры прыватныя дамы, з дзясятак – пашкоджаныя.
Ратавальнікі працягваюць разбіраць завалы і высвятляць маштабы разбурэнняў. Па горадзе раскіданыя боепрыпасы, што не здэтанавалі, на месцы працуюць піратэхнікі.
Горад Нікапаль, размешчаны побач з акупаваным Энэргадарам, ужо некалькі разоў зазнаваў абстрэлы, у тым ліку апошнімі днямі. 19 ліпеня па горадзе выпусцілі да 40 снарадаў, былі разбураныя два прамысловыя прадпрыемствы. 18 ліпеня расейскія войскі запусцілі па горадзе больш за 60 снарадаў, якімі пашкодзілі прыватныя дамы, шпіталь, прамысловае і энергетычнае прадпрыемствы, порт. 6 ліпеня па Нікапалі выпусцілі 53 снарады, якія пашкодзілі 12 пяціпавярховікаў, школу і вучэльню.
Алена Рувіна belsat.eu
