Паступаюць супярэчлівыя звесткі адносна таго, ці адмяніў Звяз еўрапейскіх футбольных асацыяцыяў (УЕФА) правядзенне падзеяў пад сваёй эгідай у Беларусі.
Пра тое, што ўсе спаборніцтвы УЕФА, запланаваныя на 2021 год у Беларусі, не адбудуцца, паведаміў Фонд спартовай салідарнасці са спасылкай на намесніка генеральнага сакратара УЕФА Кевіна Лямура, якому былі дасланыя адпаведныя запыты.
Паводле фонду, Лямур таксама выказаў асабістую салідарнасць з тымі спартоўцамі, якія змагаюцца за абарону сваіх правоў, у тым ліку права на свабоду выказвання меркаванняў.
Між тым, расейскае выданне «Чемпионат» піша, што ў УЕФА абверглі поўную адмену спаборніцтваў пад сваёй эгідай у Беларусі.
«Маючыя адбыцца матчы нацыянальнай зборнай і клубных спаборніцтваў УЕФА запланаваныя ў Беларусі.
Як паведамлялася раней, Ліга чэмпіёнаў УЕФА па футзале 2021, фінал чэмпіянату УЕФА сярод жанчын да 19 гадоў 2021 года і Кангрэс УЕФА 2021 года не адбудуцца ў Беларусі», – паведамілі выданню ў прэс-службе УЕФА.
«Гаворка не пра матчы»
У адказ на апошняе паведамленне Фонд спартовай салідарнасці апублікаваў адказ УЕФА на свой зварот. У ім адзначаецца, што «ні адно спаборніцтва або іншае мерапрыемства пад эгідай УЕФА не адбылося і не будуць праводзіцца ў Беларусі ў 2021 годзе».
«Гаворка ў лісце не ідзе пра матчы. А гаворка ідзе менавіта аб мерапрыемствах і падзеях пад эгідай УЕФА. Бо футзал – гэта клубны турнір, то клубныя турніры могуць таксама не адбыцца, па логіцы. Прэса не дакладна трактавала навіну», – заявіў выканаўчы дырэктар Фонду Аляксандр Апейкін.
МГ belsat.eu
