Блізкія Міколы Дзядка апублікавалі ліст ад яго, у якім палітвязень распавёў, што адміністрацыя калоніі № 9 дэманстратыўна знішчае лісты, якія яму дасылаюць.
Раней, нагадаем, палітвязню прызначылі чатыры месяцы ПКТ – памяшкання камернага тыпу.
«Працягваюцца канфіскацыі і знішчэнні лістоў у максімальна здзеклівай форме. Справа выглядае так: мне прыносяць акты, дзе напісана, што ліст ад… знішчаны, бо носіць цынічны характар, прапануюць распісацца. Я пытаю, што такое цынічны характар? Мне ў адказ: «Вы распісвацца будзеце?» І так па коле. Такім чынам было знішчана ўжо каля 45 лістоў. Іх дэманстратыўна, моўчкі, прачытваюць пры мне, а потым хаваюць у канверт і знішчаюць. Усё гэта адбываецца пад відэарэгістратар.
Зусім відавочна, што ніякага цынізму ў лістах няма. Гэта проста легальны спосаб пазбавіць мяне перапіскі і падстрахоўваецца тым, што потым знішчаюць гэтыя лісты, каб пасля нельга было нічога праверыць».
У астатнім, піша Дзядок, «звычайнае быццё ў ПКТ». «Большую частку сваіх заняткаў прыйшлося адкласці з-за розных рэжымных абмежаванняў. Напрыклад, пакуль не малюю, бо няма чым тачыць алоўкі», – дадае ён.
- Блогер, актывіст анархічнага руху Мікола Дзядок быў затрыманы 11 лістапада. Пры затрыманні ён быў моцна збіты, потым яго адвезлі ў ГУБАЗіК, дзе катавалі. 10 лістапада 2021 года Менгарсуд пакараў палітвязня 5 гадамі калоніі агульнага рэжыму.
РР belsat.eu
