Спробы незаконнага пераходу мяжы працягваюцца дагэтуль, з беларускага боку парушальнікаў пільнуюць беларускія памежнікі.
Польскія памежнікі зафіксавалі 17 снежня чарговую спробу прарыву беларуска-польскай мяжы. Перайсці мяжу ў раёне Чарэмшы, што на дарозе з Берасця ў Беласток, спрабавалі 32 чалавекі. Польскіх вайскоўцаў закідвалі камянямі і сляпілі лазерамі пад наглядам беларускіх службоўцаў.
Таксама 17 снежня Польшча выдала 15 пастановаў аб высылцы.
Паводле польскай Памежнай аховы, за бягучы месяц беларуска-польскую мяжу спрабавалі незаконна перайсці 1200 чалавек, а за год – 39,1 тысяча.
Тым часам Памежная служба Латвіі адзначае рост колькасці спробаў незаконна перайсці беларуска-латвійскую мяжу. На той мяжы ў пятніцу выявілі 60 спробаў незаконнага пераходу, агулам са жніўня выявілі 3187 спробаў. У Літве заўважылі прыпыненне спробаў незаконнага пераходу мяжы.
АА belsat.eu