У пасёлку Сасновы Бор Светлагорскага раёну мужчына замяніў беларускі дзяржаўны сцяг на сцяг Украіны. Цяпер супраць 41-гадовага мясцовага жыхара распачалі крымінальную справу, паведамляе выданне «Светлагорскія навіны».
У Следчым камітэце выданню расказалі, што інцыдэнт адбыўся ўначы з 13 на 14 кастрычніка. Хтосьці перарэзаў дрот з флагштока і зняў сцяг Рэспублікі Беларусь, які выкінуў у кантэйнер непадалёк будынку. Замест яго падняў украінскі сцяг.
Следчы камітэт распачаў крымінальную справу па факце глумлення з дзяржаўнага сцяга паводле арт. 370 КК.
Затрымалі 41-гадовага грамадзяніна Беларусі. Паведамляецца, што раней ён не быў пад судом і ў момант здзяйснення ўчынку быў нецвярозы. У месцы яго жыхарства падчас ператрусу нібыта знайшлі «сімволіку экстрэмісцкай накіраванасці», паведамілі ў сілавым ведамстве.
Вырак у падобнай справе вынеслі ў жніўні гэтага года. У судзе Віцебску 23-гадоваму мясцоваму жыхару прысудзілі 2 гады абмежавання волі за глумленне з дзяржаўнага сцяга. Ён сарваў сцяг, які быў усталяваны на будынку крамы.
Алена Рувіна belsat.eu