Аляксандр Лукашэнка ў аўторак 18 кастрычніка сустракаўся з расейскім філосафам і грамадскім дзеячам Аляксандрам Дугіным, які мае адыёзную рэпутацыю. Размова доўжылася больш за дзве гадзіны. Аб гэтым паведамляе тэлеграм-канал «Пул Первого».
Аляксандр Лукашэнка не хавае захапленне падобнымі персонамі: «Нам трэба трымацца адзін каля аднаго. Не трэба нечага дзяліць. Усе ролі гісторыя размеркавала даўно», – сказаў Лукашэнка на сустрэчы з Дугіным.
Вядома, што погляды Аляксандра Дугіна даследчыкамі шырока ацэньваюцца як фашысцкія. Сам Дугін заўсёды адмаўляў гэтыя абвінавачванні, прылічваючы сябе да ўласнай «чацвёртай палітычнай тэорыі», якая, на яго думку, павінна быць наступным крокам у развіцці палітыкі пасля першых трох: лібералізму, сацыялізму і фашызму. Палітычная дзейнасць Дугіна накіравана на стварэнне еўразійскай звышдзяржавы праз інтэграцыю Расеі з былымі савецкімі рэспублікамі ў новы Еўразійскі саюз (ЕАС).
У жніўні 2022 пасля выбуху аўтамабіля ў Маскоўскай вобласці загінула дачка філосафа – Дарʼя Дугіна. ФСБ сцвярджае, што забойства арганізавалі ўкраінскія спецслужбы, а выканаўцам стала грамадзянка Украіны Наталля Воўк. Кіеў адмаўляе датычнасць да забойства.
Дарʼя Дугіна – паслядоўніца свайго бацькі, аднаго з ідэолагаў «русского мира» Аляксандра Дугіна. Выступала як каментатар у расейскіх праўладных СМІ. Дугіна падтрымлівала ўварванне Расеі ва Украіну і падчас вайны ездзіла на тэрыторыі, акупаваныя Расеяй.
Антон Тачняк belsat.eu
