Журналістка Кацярына Карпіцкая распавяла ў Facebook пра месяц свайго зняволення ў ЦІП на Акрэсціна. Абставіны свайго затрымання яна пакінула на асобны пост.
«30 сутак там у сённяшніх умовах мне хапіла, каб выйсці з букетам новых хвароб – ад фарынгатрахеіту да цыстыту і кароны (дарэчы, менавіта прышчэпка дапамагла перанесці апошняе досыць лёгка ў параўнанні з маімі сукамерніцамі). А людзі сядзяць там па 60 сутак і больш, у залежнасці ад таго, колькі пратаколаў ім захочуць накінуць», – кажа журналістка.
Паводле яе, вязняў «ніколі не водзяць у душ і не выдаюць нават шчотак з асаблівых рэчаў», а «туалетную паперу часам прыходзілася выбіваць па сантыметры».
І гэта не адзіныя абмежаванні і катаванні, з якімі сутыкаюцца вязні. Кацярына Карпіцкая працягвае:
«Сядзяць месяцамі без шпацыраў (паветра ў камеру №15 магло паступаць да нас толькі з калідора праз «кармушку», але яе спецыяльна ўвесь час зачынялі).
Сядзяць без матрацаў (падушкай нам служыў спляснелы хлеб, а на голай падлозе ці шконцы спаць было б яшчэ магчыма, але ночы даўно дзіка халодныя – нават абдымаючы адна адну і заціскаючы паміж ног бутэльку з гарачай вадой мы не маглі супакоіць дрыжыкі. Ночы ператвараліся ў цыкл фізічных практыкаванняў – прысядаць, паадціскацца, пастаяць у планцы – неяк пагрэцца і заснуць).
Сядзяць без сноў (у два і чатыры ночы нас падымалі на пераклічкі; пра тое, што там суткамі гарыць яркае штучнае асвятленне, і нагадваць не трэба).
Сядзяць без перадач (многіх жанчын забіралі з працы ці лецішч у спадніцах, сукенках, і яны так і ляжалі начамі на халоднай падлозе, пакуль нехта з тых, хто выходзіў на волю, не здымаў з сябе байку ці трусы-шкарпэткі. Шчоткай, якая ў спадчыну дасталася мне, карысталася яшчэ чалавек пяць да гэтага, здаецца. А ў майцы хадзіла сама маці «Хлопотного дельца»)».
Паводле журналісткі, вязні сядзяць на палову галодныя, без адэкватнай медычнай дапамогі.
Апроч гэтага, да палітычных наўмысна падсяляюць вязняў з вошамі, расстройствамі кішэчніка і грыбком, абстынентным сіндромам.
«Нам забараняюць сядзець і спаць, абражаюць, але мы працягваем жартаваць і з камер чуецца смех – усё гэта вельмі раздражняе супрацоўнікаў ЦІП», – адзначае Кацярына Карпіцкая.
Скаргі на катаванні і прамыя злачынствы ў дачыненні да беларусаў яна збіраецца пісаць у дзяржустановы, «хоць яны пасля і скажуць, што дадзеныя факты не пацвердзіліся».
МГ belsat.eu