Belsat.eu падводзіць вынікі 18 жніўня – 375-га дня пратэсту беларускага грамадства супраць фальсіфікацыі вынікаў прэзідэнцкіх выбараў і гвалту з боку ўладаў.
Раніцу беларускія ўлады пачалі не з кавы, а з рэпрэсіяў супраць журналістаў навіннага агенцтва БелаПАН. Прайшлі ператрусы ў журналістаў і ў офісе, былі заблакаваныя сайты, а сервер канфіскаваны.
Затрыманыя галоўны рэдактар Ірына Леўшына, бухгалтар Кацярына Боева і былы дырэктар агенцтва Дзмітрый Наважылаў.
Рэпрэсіі працягнуліся канвеерным прызнаннем незалежных тэлеграм-каналаў і чатаў экстрэмісцкімі.
Вярхоўны суд прызнаў тэрарыстычнай арганізацыю «Атрады грамадзянскай самаабароны Беларусі», а Мінюст падаў позву пра ліквідацыю грамадзянскай арганізацыі БНФ «Адраджэньне».
Між тым кібер-партызанамі, якіх таксама сёння прызналі экстрэмістамі, падвялі папярэднія вынікі сваёй спецаперацыі «Спёка», заявіўшы, што паралізавалі значную частку працы сілавікоў, і паабяцаўшы, што гэта толькі пачатак.
А аб’яднанне былых сілавікоў «BYPOL» выпусціла расследаванне пра тое, хто стаіць за арганізацыя міграцыйнага крызісу на мяжы Беларусі з краінамі Еўразвязу. Спойлер – гэта ўлады, а канкрэтней найвышэйшае кіраўніцтва КДБ, МУС і гэтак далей.
Еўразвяз між тым працягвае супрацьстаяць рукатворнаму крызісу: Літва, напрыклад, дасылае нелегалаў назад у Ірак, а Польшча – узмацняе антыміграцыйнае заканадаўства.
Літоўскія ўлады таксама паказалі відэа, як беларускія сілавікі здымаюць відэа пра тое, як мігрантаў нібыта збіваюць памежнікі Літвы. Там таксама пачалі расследаванне незаконнага перасячэння беларускімі сілавікамі дзяржаўнай мяжы.
Спробы Лукашэнкі націснуць на суседнія краіны дапамагаюць беларускаму пытанню заставацца ва ўвазе заходніх краін. Гэтак, Святлана Ціханоўская дамовілася з кіраўніком Еўрапарламенту пра арганізацыю слуханняў па Беларусі.
А канцлерка Нямеччына Ангела Мэркель ляціць у Маскву, каб сярод іншага абмеркаваць і беларускае пытанне. Наша краіна цяпер на адным узроўні з Афганістанам.
А пра тое, да чаго прыводзіць сусветная ўвага, можа распавесці «Абсалютбанк», які на мінулым тыдні патрапіў пад санкцыі ЗША, а на гэтым заявіў пра спыненні аперацыяў у валюце.
З нечаканымі праблемамі сутыкнуліся і тыя, хто хацеў стаць індывідуальныя прадпрымальнікі. Кажуць пра тэхнічныя цяжкасці, але пакуль не зразумела, ці гэта кібер-партызаны партызаняць, ці ўлады выконваюць загад Лукашэнкі ці спецыялістаў на тле рэпрэсіяў не засталося.
МГ belsat.eu