У нядзелю 17 ліпеня ў крамах Берасця і Пінску беларусы рэзка пачалі скупляць цукар пасля чутак, што ён можа падаражэць амаль удвая, да 4 рублёў з паловай. У «Белдзяржхарчпраме» на такі ажыятаж адказалі, што «хопіць усім», а запас цукру ў Беларусі дазваляе захоўваць на яго ранейшыя цэны.
«Цукровыя заводы поўнасцю гатовыя да сезону масавых нарыхтовак садавінагароднінай сыравіны», – запэўнілі ў канцэрне.
Як заявіў начальнік упраўлення каардынацыі паставак тавараў на ўнутраны рынак і замежнагандлёвай дзейнасці канцэрну «Белдзяржхарчпрам» Ігар Груца, сёння на складах заводаў ёсць больш за 100 тыс. тон цукру. «Гэты аб’ём з лішкам пакрывае патрэбу ўнутранага рынку да пачатку новага сезону вытворчасці цукру, што пачнецца ўжо ў верасні», – паведаміў ён.
«Сфармаваны запас прадукцыі дае падставы для захавання цяперашніх цэнаў на цукар. А спрыяльныя ўмовы надвор’я дазваляюць экспертам рабіць аптымістычныя прагнозы на новы ўраджай цукровых буракоў. Ужо ў верасні пачнецца сезон перапрацоўвання салодкіх караняплодаў. А значыць, будзе і цукар у краіне», – паабяцаў Груца.
Паводле інфармацыі афіцыйных прафсаюзаў, што займаюцца маніторынгам цэнаў, з пачатку года цукар падаражэў на 48,2 %. Між тым беларускі цукар заўважылі ў супермаркетах акупаванага расейскімі войскамі Мэлітопалю.
Алена Рувіна belsat.eu