У нядзелю 18 ліпеня ў сталіцы Францыі прайшла акцыя салідарнасці з затрыманымі праваабаронцамі «Вясны», а таксама з усімі беларускімі палітвязнямі, арганізаваная FIDH – Міжнароднай федэрацыяй за правы чалавека, паведамляе Праваабарончы цэнтр «Вясна».
У мерапрыемстве прыняў удзел сенатар Парыжу Рэмі Фера, які ў сваім выступе адзначыў, што Францыя павінна рабіць усё магчымае і змагацца за вызваленне праваабронцы Алеся Бяляцкага, ягоных паплечнікаў, да той пары, пакуль Беларусь не стане дэмакратычнай краінай.
Сенатар таксама падкрэсліў, што старшыня «Вясны» Алесь Бяляцкі з’яўляецца ганаровым грамадзянінам Парыжу з 2012 года.
Генеральная дырэктарка FIDH Элеанор Марэль у сваёй прамове ўзгадала, што амаль 10 гадоў таму, Алесь Бяляцкі, які ў той момант зʼяўляўся віцэ-прэзідэнтам FIDH, быў заключаны ў турму па палітычных матывах. Пасля ягонага арышту FIDH неадкладна разгарнула маштабную кампанію за ягонае вызваленне, мабілізуючы міжнародную супольнасць і выступаючы ў абарону Бяляцкага на самым высокім узроўні. У 2012 годзе FIDH звярнулася ў ААН, якая абвясціла затрыманне Бяляцкага незаконным і запатрабавала ягонага неадкладнага і безумоўнага вызвалення. Правёўшы 1052 дня (амаль тры гады) у зняволенні ў цяжкіх умовах, Алесь Бяляцкі быў нарэшце вызвалены.
«Гэтая новая хваля рэпрэсій зʼяўляецца яшчэ адным доказам таго, што рэжым Лукашэнкі вядзе сістэматычную кампанію, каб прымусіць замаўчаць усе галасы, якія засталіся нязгоднымі, і здушыць грамадзянскую супольнасць у Беларусі», – падкрэсліла выступоўца.
Элеанор Марэль ад імя FIDH заклікала беларускія ўлады спыніць рэпрэсіі і неадкладна вызваліць усіх палітвязняў.
14 ліпеня 2021 года адбылася чарговая атака на грамадзянскую супольнасць: па ўсёй Беларусі прайшлі ператрусы, допыты і затрыманні праваабаронцаў, журналістаў, грамадскіх актывістаў, сябраў некамерцыйных арганізацый. У гэты дзень затрымалі 11 праваабронцаў з «Вясны».
Па сканчэнні 72 гадзін пасля затрымання за кратамі застаюцца старшыня арганізацыі Алесь Бяляцкі, сябра Рады «Вясны» і віцэ-прэзідэнт FIDH Валянцін Стэфановіч, юрыст «Вясны» Уладзімір Лабковіч і яго жонка Ніна Лабковіч.
ГГ, belsat.eu