Украінскі консул Аляксандр Сасанюк затрыманы ў Санкт-Пецярбурзе падчас сустрэчы з грамадзянінам РФ. Пра гэта паведамляе «РИА Новости» са спасылкай на ФСБ.
У ФСБ сцвярджаюць, што затрыманы ўкраінскі консул ў Санкт-Пецярбурзе нібыта спрабаваў атрымаць інфармацыю, якая змяшчаецца ў базах дадзеных праваахоўных органаў РФ. У ФСБ адзначылі, што гэтая дзейнасць мае «відавочны варожы характар у адносінах да Расеі».
«Да замежнага дыпламату будуць ужытыя захады ў адпаведнасці з нормамі міжнароднага права», – дадаецца ў паведамленні.
У МЗС Украіны затрыманне консулу ў Санкт-Пецярбурзе назвалі чарговай расейскай правакацыяй.
«Чарговая правакацыя на фоне дэстабілізуючы дзеянняў Расеі. Расейскія праваахоўнікі затрымалі працаўніка генеральнага консульства Украіны ў Санкт-Пецярбурзе на некалькі гадзінаў. Цяпер ён знаходзіцца ва ўкраінскай дыпустанове. Абставіны затрымання высвятляюцца. У бліжэйшы час украінскі бок вызначыцца з формай рэагавання на паказаную правакацыю з улікам існай практыкі», – сказаў спікер Міністэрства замежных справаў Украіны Алег Ніколенка агенцтву «Інтэрфакс-Украіна».
Затрыманне ўкраінскага консулу адбылося на фоне абвастрэнне стасункаў паміж Кіевам і Масквой. Расея сцягвае войскі да ўкраінскай мяжы, што выклікае занепакоенасць уладаў Украіны, а таксама лідараў краінаў Захаду.
ІІ belsat.eu
