Чэшскія ўлады не будуць патрабаваць апастылізацыю дакументаў у беларусаў, паведаміла прадстаўніца Святланы Ціханоўскай у Чэхіі Крысціна Шыянок. Гэта будзе найперш тычыцца тых, хто знаходзіцца ў Чэхіі па чэшскай доўгатэрміновай візе альбо дазволе на доўгатэрміновае ці пастаяннае пражыванне.
Крысціна Шыянок падкрэслівае, што чэшскі бок такім чынам зрэагаваў на просьбы Офісу дэмакратычных сілаў Беларусі ў Чэшскай Рэспубліцы, якія ягоныя прадстаўнікі «цягам года скіроўвалі ў МЗС, МУС, Мінюст».
«Шаноўныя беларусы і беларускі Чэхіі! Мы радыя вам паведаміць, што чэшскі бок адрэагаваў на наш запыт, і патрабаванне апастылізацыі дакументаў з РБ было прыпыненае для тых, хто знаходзіцца ў Чэхіі па чэшскай доўгатэрміновай візе альбо дазволе на доўгатэрміновае ці пастаяннае пражыванне.
Спадзяемся, што гэта рашэнне спросціць жыццё ў Чэхіі для тых з вас, хто не мае магчымасці паехаць у Беларусь», – з’явілася адпаведнае паведамленне на старонцы ў Офісу дэмакратычных сілаў Беларусі ў Чэшскай Рэспубліцы ў «Facebook».
Пры гэтым у паведамленні звяртаецца ўвага на тое, што паслабленне не тычыцца тых, хто знаходзіцца ў Чэхіі па кароткатэрміновых візах.
Раман Шавель belsat.eu