Сёлета зрабілі ўвялі шэраг новаўвядзенняў у падатковае заканадаўства: новыя віды падаткаў, падвышаныя стаўкі, новыя рэжымы падаткаабкладання і адмены льготаў. Усё проста – грошы вельмі патрэбныя! Такім чынам каментуюць новаўвядзенні эксперты праекту «Кошт ураду» ў размове з «Белсатам».
Сёлета ўлады краіны чакаюць пагаршэння макраэканамічнай кан’юнктуры. Пра гэта сведчыць не толькі прыняцце рэспубліканскага бюджэту на 2023 год з дэфіцытам Br 3,2 млрд, але і істотнае павышэнне падаткаў, кажуць эксперты праекту «Кошт ураду».
«Шмат якія крыніцы прыбыткаў з вялікай доляй імавернасці, нават на думку складальнікаў бюджэту, будуць куды меншыя за мінулагоднія. Менавіта таму і прагназуюць у 2023 годзе зніжэнне паступлення ад падаткаў на прыбытак на 2 %, акцызаў на 30 %, экалагічнага падатку на 37 %, падатку на здабычу прыродных рэсурсаў на 17 %, падатковых прыбыткаў ад вонкаваэканамічнай дзейнасці на 19 %», – ацэньваюць чаканні чыноўнікаў эканамісты.
У такіх умовах шырокамаштабны пошук любых крыніцаў папаўнення бюджэту будзе абгрунтаваным крокам дзеля павышэння сумы, атрыманай ад падаткаў з насельніцтва краіны. Сёлета больш плаціць у казну дзяржавы давядзецца практычна ўсім без выключэння.
Адметна, звяртаюць увагу эксперты, што чыноўнікі абгрунтоўваюць павышэнне падатковага цяжару для беларусаў як «выраўноўванне ўмоваў вядзення бізнесу» або «павышэнне долі ўдзелу ў дзяржаўных выдатках». Беларусам недвухсэнсоўна даюць зразумець, што яны недаплачваюць за сацыяльна арыентаваную дзяржаву.
«Напрыклад, ІП, як выявілася, не апраўдалі аказанага ім уладамі высокага даверу – працавалі больш на сябе, чым на дзяржаву. Яшчэ раней адмена льготаў для айцішнікаў прайшла пад лозунгам барацьбы з пандэміяй. Збор за першую кватэру, а не другую і наступныя, закліканы зраўняць усіх уладальнікаў нерухомасці. Выязджаеш за мяжу на сваім аўце – заплаці ў мясцовы бюджэт. І так куды ні паглядзі – усё за сацыяльную справядлівасць».
Каб ніхто не схаваўся ад сацыяльнай справядлівасці, звяртаюць увагу эксперты, у бюджэце на 2023 год улады запланавалі рост паступленняў ад штрафаў на 43 %. Гэта значыць, для кантралёраў і правяральнікаў праца знойдзецца.
Мікалай Каткоў belsat.eu