Пераходны кабінет: Польшча надалей будзе прызнаваць беларускія дыпломы аб адукацыі
Польшча надалей будзе прызнаваць беларускія дыпломы аб адукацыі, нягледзячы на скасаванне рэжымам Лукашэнкі беларуска-польскага пагаднення. Пра гэта паведамляе тэлеграм-канал Аб’яднанага пераходнага кабінету Беларусі.
«Мы надалей будзем прызнаваць беларускія пасведчанні і дыпломы. Для нас пагадненне працягвае дзейнічаць», – заявіў дзяржсакратар Міністэрства адукацыі і навукі, паўнамоцны прадстаўнік ураду Польшчы ў пытаннях развіцця і міжнародных стасункаў у галіне адукацыі і навукі Томаш Жымкоўскі падчас сустрэчы з прадстаўнікамі Абʼяднанага пераходнага кабінету Паўлам Латушкам і Алінай Коўшык.
Падчас сустрэчы была абмеркаваная таксама магчымасць сумеснага з польскімі ўладамі рашэння, якое б зрабіла апастылі ад беларускіх уладаў непатрэбнымі, а адсутнасць сертыфікату ЦТ не перашкаджала б пры паступленні ў польскія ВНУ беларускім абітурыентам, якія не могуць атрымаць яго з-за рэпрэсій. Прадстаўнікі Аб’яднанага пераходнага кабінету Беларусі разам з Міністэрствам адукацыі і навукі Польшчы дамовіліся сумесна распрацаваць адпаведныя інструкцыі ў гэтай справе.
Абмяркоўвалася таксама магчымасць стварэння сеткі суботніх школаў для вывучэння беларускай мовы, літаратуры і гісторыі. Вялася гаворка і пра павелічэнні стыпендыяў для беларускіх студэнтаў у Польшчы.
«Польскі бок выказаў зацікаўленасць у прыняцці на працу беларускіх настаўнікаў пасля настрыфікацыі іх дыпломаў», – гаворыцца ў паведамленні Пераходнага кабінету.
Для дасягнення практычных вынікаў у вызначаных напрамках сумеснай дзейнасці будзе створаная працоўная група на прыкладзе супрацы Аб’яднанага пераходнага кабінету Беларусі з Міністэрствам унутраных спраў і адміністрацыі, Міністэрствам спорту і турызму Польшчы.
Напрыканцы кастрычніка 2022 года Беларусь выйшла з міжурадавага пагаднення з Польшчай аб узаемным прызнанні дакументаў аб вышэйшай адукацыі і ступеняў у навуцы і мастацтве.
Зміцер Міраш belsat.eu
