Нягледзячы на паведамленні шэрагу расейскіх медыяў, найміты ПВК Вагнэра працягваюць заставацца ў Беларусі. Пра гэта 16 жніўня завілі ў маніторынгавай групе «Беларускі Гаюн».
«Паводле нашых ацэнак, усяго ў Беларусі могуць заставацца 4000–4500 наймітаў ПВК Вагнэра. Інфармацыя пра вываз часткі наймітаў з Беларусі ў Расею ўсё яшчэ не атрымала пацвярджэнняў. Таксама мы не фіксавалі адмысловых вывазных рэйсаў з наймітамі з Беларусі ў Афрыку», – гаворыцца ў паведамленні.
Асноўным месцам размяшчэння наймітаў ёсць лагер у вёсцы Цэль Асіповіцкага раёну. Таксама яны выкарыстоўваюць для сваіх мэтаў былы вайсковы гарадок № 28 «Паплавы» ў Асіповіцкім раёне. Актыўных іх перасоўванняў па Беларусі не фіксуецца.
Адным з напрамкаў дзейнасці наймітаў ёсць трэнаванне вайскоўцаў і сілавікоў рэжыму Аляксандра Лукашэнкі. А іхная прысутнасць у Беларусі «актыўна выкарыстоўваецца для правядзення інфармацыйных правакацыяў і стварэння напружанасці на межах з краінамі NATO», заявілі ў «Беларускім Гаюне».
Тым часам стала вядома, што Міністэрства юстыцыі Беларусі 4 жніўня зарэгістравала ў вёсцы Цэль кампанію ТАА «Група Вагнэр» у Асіповіцкім райвыканкаме. Кампанія заявіла сваёй адзінай дзейнасцю адукацыйную. У рэестры яна праходзіць пад кодам 85590, якім рэгіструюцца навучальныя цэнтры з карэкцыйнымі курсамі, курсы павышэння кваліфікацыі, навучанне замежным мовам, кампʼютарныя курсы, курсы выжывання, рэлігійнае навучанне, навучанне аратарскаму мастацтву і хуткаснаму чытанню.
Гэта ўжо другая кампанія ПВК Вагнэра ў Беларусі. Раней была зарэгістраваная «Канкорд менеджмент і кансалтынг».
Якуб Хруст belsat.eu