Прыватная вайсковая кампанія Вагнэра, якая ані ў Беларусі, ані ў Расеі дагэтуль не мае юрыдычнага статусу, стане дадаткам да рэгіянальнай групоўкі Збройных сілаў дзвюх краінаў. Пра гэта паведамляе расейскі тэлеграм-канал BRIEF.
Як адзначаецца, фінансаваць вагнэраўцаў у Беларусі будзе Міністэрства абароны РФ.
Гэтую інфармацыю публікуе і тэлеграм-канал «Белорусский силовик». Але, як адзначае «Беларускі Гаюн», раней гэты канал быў неаднаразова заўважаны ў падтрыманні інфармацыйна-псіхалагічных аперацыяў.
Як паведаміў у Twitter дзяржаўны сакратар канцылярыі прэм’ер-міністра Польшчы Станіслаў Жарын, Група Вагнэра прысутнічае ў Беларусі.
«Прыехалі першыя вагнэраўцы, іх на гэты момант можа быць некалькі сотняў. Польскія службы адсочваюць сітуацыю, каб ведаць, колькі вагнэраўцаў у выніку апынецца ў Беларусі», – напісаў ён, нагадаўшы, што першыя вагнэраўцы ўжо праводзяць навучанне беларускай арміі.
Жарын адзначыў, што канчатковы маштаб удзелу ў ПВК Вагнэра ў Беларусі пакуль не вядомы, «гэтая справа застаецца на кантролі ў польскіх спецслужбаў».
«Мы ведаем адно: расейцы будуць выкарыстоўваць групу Вагнэра, як яны гэта робяць ва ўсім свеце. Вагнэраўцы дэ-факта выконваюць місіі для Крамля і ад імя Крамля», – дадаў ён.
Украінскія памежнікі таксама адсочваюць «гэтую сітуацыю, каб разумець усе месцы, дзе яны будуць дыслакавацца, якая колькасць іх будзе і якія задачы яны будуць выконваць», заявіў 15 ліпеня спікер ДПСУ Андрэй Дэмчанка ў каментары выданню «Українська правда».
Тым часам выведка Вялікай Брытаніі лічыць, што ў Расеі пасля «разгубленасці» з прычыны спробы мяцяжу вагнэраўцаў пачала фармавацца дамоўленасць адносна будучыні групы.
Як адзначаецца, 12 ліпеня Мінабароны Расеі абвясціла, што ПВК Вагнэра перадало 2000 адзінак вайсковай тэхнікі, у тым ліку танкі. На дзень 15 ліпеня прынамсі невялікі кантынгент вагнэраўцаў прыбыў у лагер у Беларусі.
«У той жа час некаторыя звязаныя з «Вагнэрам» групы ў сацыяльных сетках аднавілі сваю дзейнасць, засяродзіўшыся на асвятленні дзейнасці групоўкі ў Афрыцы. Паводле нядаўніх заяваў расейскіх чыноўнікаў, дзяржава, імаверна, гатовая прыняць імкненне Вагнэра захаваць сваю шырокую прысутнасць на кантыненце», – гаворыцца ў аглядзе.
Раніцай 15 ліпеня «Беларускі Гаюн» паведаміў, што буйная калона легкавых і цяжкавых аўтамабіляў з нумарамі самаабвешчаных ДНР/ЛНР была заўважаная ў раёне Крычава. Сукупнасць фактараў сведчыць, што гэта калона ПВК Вагнэра.
Напярэдадні ў Мінабароны заявілі, што падпісалі з ПВК Вагнэра «дарожную мапу» для абмену досведам паміж беларускімі вайскоўцамі і наймітамі. Паведамлялася, што баевікі ўжо выступілі інструктарамі на занятках тэрытарыяльнай абароны.
Якуб Хруст belsat.eu