Памежная ахова Польшчы назвала законнай забарону на ўезд незастрахаваных аўтамабіляў з Беларусі. Пра гэта гаворыцца ў адказе ведамства на пытанне «Белсату» пра тое, чаму кіроўцаў не пускаюць да тэрэспальскага тэрміналу для набыцця страхавога полісу.
Як запэўніў «Белсат» Дар’юш Сеніцкі, афіцыйны прадстаўнік надбужанскага аддзелу Памежнай аховы Польшчы, што кіруе пунктам пропуску ў Тэрэспалі, афіцэры падчас працы «дзеюць на падставе палажэнняў закону і выконваюць іх»:
«Працаўнікі Памежнай аховы адмаўляюць ва ўездзе транспартаваму сродку, калі ім кіруе асоба, якая не мае дакументу, што пацвярджае заключэнне дамовы абавязковага страхавання грамадзянскай адказнасці ўладальніка транспартавага сродку».
У ведамстве прызналі, што памежнікі мусяць не пускаць незастрахаванае аўта, калі ўладальнік не набудзе полісу на мяжы. Сеніцкі сцвярджае:
«На жаль, на аўтамабільным пункце пропуску ў Тэрэспалі ніводная страхавая кампанія не ажыццяўляе гэтага віду дзейнасці ў межах зоны дзеяння пункту пропуску».
Пры гэтым «Белсат» раней звязваўся з работніцаю, якая працуе акурат у будынку тэрэспальскага пункту пропуску і афармляе там полісы. Яна казала, што размяшчаецца ў галоўным корпусе тэрміналу побач з абменнікам. Паслугу надае Польская аўтамабільная асацыяцыя («Polski Związek Motorowy»). Аформленая праз іх страхоўка на месяц каштуе 163 злотыя (прыкладна 36 еўраў).
Беларусы, якія едуць у Польшчу на ўласных машынах, скардзяцца, што памежнікі пры першым жа кантролі на мосце над Бугам разварочваюць незастрахаваны транспарт і не пускаюць да тэрміналу для набыцця полісу. Пры гэтым палякі патрабуюць раздрукаванага дакументу: электронная версія на тэлефоне не пасуе.
Купляць страхоўку на мяжы даводзіцца пасля 1 чэрвеня, калі перасталі дзеяць «Зялёныя карты», аформленыя ў Беларусі.
Сяргей Крот belsat.eu