Журналісткі «Белсату» Дарʼя Чульцова і Кацярына Андрэева застаюцца за кратамі роўна шэсць месяцаў. Неўзабаве дзяўчын маюць этапаваць у гомельскую калонію.
Кацярыну і Дарʼю трымаюць за кратамі ўжо паўгода, але чвэрць іх двухгадовага турэмнага тэрміну яшчэ не мінула, бо ён адлічваецца з 20-га, а не з 15 лістапада. Рэч у тым, што першапачаткова журналісткі былі затрыманыя ў адміністратыўным парадку: першыя пяць дзён яны правялі ў зняволенні менавіта ў гэтым статусе, і 20 лістапада для іх абралі меру стрымання ў межах крымінальнага абвінавачвання.
Цяпер Кацярына і Дар’я ў турме № 8 г. Жодзіна. Але чакаецца, што неўзабаве іх мусяць этапаваць у гомельскую калонію.
Журналісткі «Белсату» Кацярына Андрэева і Дар’я Чульцова былі затрыманыя 15 лістапада 2020 года за стрым з жорсткага разгону падчас акцыі памяці Рамана Бандарэнкі і разбурэння сілавікамі народнага мемарыялу. Кацярыне і Дар’і выставілі абвінавачанне паводле ч. 1 арт. 342 («Арганізацыя і рыхтаванне дзеянняў, што груба парушаюць грамадскі парадак») Крымінальнага кодэксу. 18 лютага 2021 года суддзя Фрунзенскага раённага суда Менску Наталля Бугук пакарала Кацярыну і Дар’ю 2 гадамі пазбаўлення волі ў калоніі агульнага рэжыму.
Нашыя каляжанкі не прызналі сваёй віны і лічаць пераслед помстаю спецслужбаў за прафесійную дзейнасць.
Вырак Кацярыне і Дарʼі меў вялікі рэзананс як у Беларусі, так і на міжнародным узроўні. Палітычна матываваны пераслед нашых каляжанак асудзілі журналісты, палітыкі, грамадскія дзеячы, дыпламаты і лідары дэмакратычных краінаў.
Адвакаты Кацярыны і Дар’і патрабавалі скасаваць прысуд і спыніць вытворчасць у гэтай крымінальнай справе. Але судовая калегія Менгарсуду ў складзе Валянціны Зянькевіч, Пятра Арлова і Алены Ананіч 23 красавіка адхіліла апеляцыйную скаргу, пакінуўшы прысуд без зменаў. Самі журналісткі ў судовым паседжанні ўдзелу не бралі – суд адмовіўся далучыць іх да працэсу нават праз відэасувязь.
У жодзінскай турме Дар’ю і Кацярыну паставілі на прафілактычны ўлік як асобаў, «схільных да экстрэмізму і іншых дэструктыўных дзеянняў». Такі статус прадугледжвае, што на дзвярах камеры ёсць карычневая картка – так пазначаецца прысутнасць асобы, схільнай да экстрэмізму. Падчас паверак журналісткі мусяць называць наглядчыкам свой артыкул і казаць аб прафілактычным уліку. Для асобы, якую прызналі «схільнай да экстрэмізму», у камеры вызначанае пэўнае месца, дзе яна абавязкова павінна заставацца, калі заходзіць наглядчык. Таксама чалавека з такім статусам могуць перыядычна выклікаць на прафілактычныя гутаркі.
ІІ belsat.eu
