Першы даследча-прамысловы ўзор беларускай вакцыны ад COVID-19 плануюць атрымаць у красавіку 2023 года. Пра гэта 15 сакавіка паведаміў міністр аховы здароўя Дзмітрый Піневіч, перадае БелТА.
«Мы ў красавіку павінны атрымаць першы даследча-прамысловы ўзор, які пойдзе на даклінічныя і клінічныя выпрабаванні, каб вакцына была зарэгістраваная да канца гэтага года», – сказаў міністр.
Стварыць беларускую вакцыну ад каронавіруса, пік пандэміі якога прыпаў на 2020–2021 гады, абяцаюць ужо два гады.
Пра тое, што Беларусь атрымала ўласную вакцыну ад COVID-19, Аляксандр Лукашэнка заявіў амаль два гады таму – 7 траўня 2021 года.
«У прабірцы мы ўчора атрымалі сваю вакцыну – беларускую. Іншую, адрозную ад таго, што мы сёння купляем. Як лекары называюць, жывую вакцыну», – сказаў ён.
У студзені 2022 года старшыня прэзідыўму Нацыянальнай Акадэміі навук Уладзімір Гусакоў заявіў, што прататып беларускай вакцыны супраць каронавіруса ўжо гатовы. Паводле яго, вакцына на той момант ужо праходзіла этапы лабараторных даследаванняў і папярэднія даклінічныя выпрабаванні.
У лютым 2022 года прататып беларускай вакцыны быў нават прэзентаваны на выставе ў Нацыянальнай акадэміі навук.
У жніўні 2022 года Аляксандр Лукашэнка паведаміў, што вакцыну ад COVID-19 неўзабаве пачнуць разліваць у Беларусі.
У кастрычніку 2022 года ўжо згаданы Гусакоў сказаў, што вакцына нават «ужо прайшла клінічныя выпрабаванні і паказала сваю высокую каштоўнасць і значнасць не горш за замежныя ўзоры».
Аднак старшыня Віцебскага аблвыканкаму Аляксандр Субоцін казаў, што клінічныя выпрабаванні вакцыны маюць пачацца толькі 1 снежня 2022 года.
Але, як бачым са словаў Піневіча, клінічныя выпрабаванні дагэтуль так і не пачаліся. І запланаваныя толькі на красавік 2023 года.
Якуб Хруст belsat.eu