Раніцай 13 кастрычніка ў сярэдняй школы ў Арасе на поўначы Францыі ўзброены нажом мужчына напаў на прысутных там вучняў і настаўнікаў. Як паведамляюць СМІ, нападнік крычаў: «Алах акбар!» Адзін з настаўнікаў атрымаў смяротнае раненне, два чалавекі былі цяжка параненыя, перадае fr.euronews.
Злачынца быў затрыманы паліцыяй адразу пасля нападу. У Міністэрстве ўнутраных справаў паведамілі, што зараз яго дапытваюць. Французскія СМІ пішуць пра тое, што нападнікам быў «20-гадовы чалавек чачэнскага паходжання», які раней вучыўся ў той самай школе.
Адзін з настаўнікаў школы ад нанесеных нажавых раненняў сканаў (паводле сведкаў, ахвярай стала выкладчыца французскай мовы). Параненыя супрацоўнік школы і яшчэ адзін настаўнік. Ніхто з вучняў не пацярпеў, хоць усё адбывалася на іх вачах.
СМІ паведамляюць таксама, што каля іншай школы ў Арасе быў затрыманы брат нападніка. У сувязі з трагічным інцыдэнтам усе школы ў горадзе былі закрытыя. Паведамляецца, што на месца здарэння выехаў прэзідэнт Францыі Эманюэль Макрон.
«Белсат» паведамляў 13 кастрычніка, што літоўскія школы і садкі атрымалі ў гэты дзень больш за 300 лістоў з пагрозамі выбухаў. Лісты былі напісаныя на расейскай мове.
Зміцер Міраш belsat.eu
