Літва плануе мадэрнізаваць грамадзянскую абарону. Сярод сцэнароў – катастрофа на БелАЭС
Грамадзянская абарона – у занядбаным стане і не ўлічвае ваеннай пагрозы, прызнае міністарка ўнутраных справаў.
Міністэрства абароны Літвы падрыхтавала Канцэпцыю ўмацавання грамадзянскай бяспекі да 2030 года. Плануюць умацаваць здольнасць сістэмы грамадзянскай абароны дзеяць у крызісных і надзвычайных сітуацыях, а таксама ў ваенных умовах.
Міністарка ўнутраных справаў Агне Білатайце расказала, што сфера грамадзянскай абароны «была занядбаная цягам гадоў, таму неабходна яе фундаментальна мадэрнізаваць, асабліва ва ўмовах цяперашняй геапалітычнай напружанасці ў рэгіёне». Да таго ж, сістэма рыхтавалася толькі да лакальных надзвычайных сітуацыяў, але не да ваенных пагрозаў.
Большасць установаў Літвы цяпер не мае планаў і сродкаў для ліквідацыі надзвычайных сітуацыяў. У Літве выявілі нават недастатковую колькасць сірэнаў: яны могуць папярэдзіць толькі 54 % насельніцтва, іх колькасць трэба падвоіць. Толькі 67 % літоўцаў атрымалі тэставыя папярэджанні на мабільныя тэлефоны. У выпадку надзвычайнай сітуацыі сховішчаў хапіла б толькі на 18 % насельніцтва Літвы.
Сярод прыярытэтаў канцэпцыі – навучанне, апавяшчэнне насельніцтва, развіццё эвакуацыйных сілаў, а таксама рыхтаванне да радыяцыйнай катастрофы на Астравецкай атамнай электрастанцыі. БелАЭС месціцца за 21 км ад мяжы з Літвой і за 40 км ад літоўскай сталіцы, у чэрвені на Віленшчыне ўжо ладзілі вучэнні на выпадак аварыі.
На рыхтаванне да магчымай аварыі Літва вылучыла сёлета 17,75 млн еўраў, а за пяць гадоў сума мае вырасці да 91,5 млн еўраў. Агулам на ўсю канцэпцыю да 2030 года трэба вылучыць каля 200 млн еўраў.
Алесь Наваборскі belsat.eu
