Афіша гурта «Molchat Doma» ў канцы 2021 года была сумная: давялося праз пандэмію перанесці некалькі канцэртаў еўрапейскага туру – у Рызе, Амстэрдаме, Ляйпцыгу, Празе і Вене. Затое ў красавіку гурт ляціць у Амерыку.
Спачатку менскае трыа выступіць у мексіканскім горадзе Мантэрэй на «Tecate Pal Norte Festival»: там выступяць «The Strokes», «Maroon 5», «Papa Roach» ды іншыя зоркі.
Адтуль паедуць у Каліфорнію на фэст «Coachella» – адзін з найбуйнейшых і найвядомейшых у свеце музычных фестываляў. У адзін дзень з «Дамамі», 17 красавіка, выступіць рэпер Е (так цяпер завуць Канье Ўэста), «Fatboy Slim», «Run the Jewels» ды іншыя, а за дзень да іх мае спяваць Білі Айліш.
Потым «Molchat Doma» збіраюцца праз выступы ў Арызоне і Тэхасе выбрацца на паўночны ўсход Злучаных Штатаў з заездам у Канаду і канцэртаваць там да канца траўня. Пасля маюць вярнуцца ў Еўропу, выступіць у Барсэлоне, Хельсінкі, Катавіцах, Осла і на партугальскім «Festival Vodafone Paredes de Coura».
Гурт выступае і на радзіме. Вось так яны гралі ў Менску ў 2020 годзе:
У тым годзе гурт падтрымаў беларускія пратэсты і даў песню для складанкі на падтрыманне пацярпелых ад гвалту сілавікоў. Уявіць, што гурт думае пра сітуацыю на радзіме, можна з песень і кліпаў «Не смешно» і «Звёзды».
Музычны праект «Molchat Doma» сабраўся ў Менску ў 2017 годзе, грае пост-панк, сінці-поп і нью-вэйв, запісаў тры студыйныя альбомы. Гурт даволі хутка заўважылі ў Еўропе, у тым ліку дзякуючы выступу на «Tallin Music Week».
АА belsat.eu