Тое, што Расея нарошчвае вайсковую прысутнасць на мяжы з Украінаю, непакоіць краіны Балтыі, якія адчуваюць сябе «паўвостравам NATO».
Прэм’ер-міністарка Эстоніі Кая Калас расказала агенцтву «Reuters», што краіны Балтыі вядуць перамовы з Паўночнаатлантычным альянсам пра павелічэнне вайсковай прысутнасці NATO на сваёй тэрыторыі, каб супрацьстаяць магчымай агрэсіі Расеі.
«Вядома, мы абмяркоўваем з нашымі саюзнікамі павелічэнне іхнай прысутнасці тут, каб яны былі стрымлівальным фактарам, – сказала Калас. – Калі вы пагледзіце на мапу, то краіны Балтыі — гэта паўвостраў NATO, і таму мы хвалюемся».
Яна заклікала не толькі весці канструктыўныя перамовы з Масквой, але і даць Крамлю зразумець, што за эскалацыю сітуацыі ва Украіне давядзецца заплаціць высокую цану праз эканамічныя санкцыі. Калам заявіла, што Захад цяпер не робіць нічога няправільнага і не фармуе ўзброеных групаў для атакі на Расею.
Расея, якая нарошчвае вайсковую прысутнасць на мяжы з Украінай, адначасова патрабуе ад NATO не размяшчаць войскаў ва ўсходніх краінах альянсу. Генеральны сакратар NATO Енс Стольтэнбэрг жа кажа, што ўзмацненне вайсковай прысутнасці альянсу ва ўсходніх краінах будзе разглядацца ў выпадку расейскай агрэсіі супраць Украіны.
Адзін з дыпламатаў NATO расказаў «Reuters», што пытанне пра дадатковыя войскі ў Балтыі могуць абмеркаваць у сярэдзіне лютага на сустрэчы міністраў абароны краінаў альянсу.
АА belsat.eu