Пра смерць 21-гадовага беларускага вайскоўца паведамілі на афіцыйным сайце Дзяржаўнага памежнага камітэту. Мужчына служыў у Мазырскім памежным атрадзе. Удакладняецца, што на целе вайскоўца выяўленыя прыкметы суіцыду.
«Учора, 11 снежня, на тэрыторыі памежнай заставы «Роза Люксембург» знойдзенае цела вайскоўца з прыкметамі суіцыду. Шараговец 2003 года нараджэння быў прызваны ў траўні 2023 года і праходзіў тэрміновую службу ў Мазырскім памежным атрадзе», – гаворыцца ў паведамленні прэс-службы падраздзялення.
Прычыны здарэння, якое адбылося ў Ельскім раёне Гомельскай вобласці, высвятляюцца. Паведамляецца, што на месцы здарэння працуе следча-аператыўная група.
Камандаванне атраду і кіраўніцтва Дзяржаўнага памежнага камітэту выказалі ў паведамленні спачуванні сваякам і блізкім вайскоўца. Ягонае прозвішча не агучваецца.
Зміцер Міраш belsat.eu