Палітык Мікола Статкевіч сустракае дзень народзінаў у Гомельскім СІЗА. Сёння яму споўнілася 65 гадоў. Узгадваем апошнія акцыі Статкевіча, які да апошняга заставаўся адным з самых рашучых вулічных палітыкаў.
У адным з лістоў, які атрымала жонка Статкевіча Марына Адамовіч, ён пісаў, што следства ў яго справе завершанае:
«Судзіць» разам са мной будуць яшчэ Сяргея Ціханоўскага, Арцёма Сакава, Дзмітрыя Папова, Уладзіміра Цыгановіча, Ігара Лосіка. Кожнага з нас абвінавачваюць паводле арт. 293 ч. 1. («Арганізацыя масавых беспарадкаў, якія суправаджаліся гвалтам над асобай, пагромамі, падпаламі, знішчэннем маёмасці або ўзброеным супрацівам прадстаўнікам улады». – Заўв. «Белсату»). Акрамя таго, ва ўсіх «саўдзельнікаў», за выключэннем аднаго мяне, ёсць яшчэ дадатковыя артыкулы КК».
Цяпер Міколу Статкевіча трымаюць у Гомельскім СІЗА, а суд праходзіць у закрытым рэжыме.
Навінаў з цяперашняга судовага паседжання прыходзіць надзвычай мала, кажа жонка Міколы Статкевіча Марына Адамовіч.
«Літаральна днямі я даведалася, што судовы працэс над Міколам плануюць працягваць як мінімум да канца жніўня. Ніякіх іншых навінаў адтуль не выцякае, бо гэты закрыты працэс праводзіцца дзеля бяспекі суддзі, пракурорскіх работнікаў. Пры відавочнай адсутнасці базы доказаў якога б там не было злачынства», – распавяла журналістам жонка палітыка Марына Адамовіч.
Гэта не першае зняволенне Статкевіча. За ўдзел у Плошчы-2010 яго прысудзілі да шасці гадоў пазбаўлення волі, палітык выйшаў на свабоду датэрмінова ў 2015 годзе. Неўзабаве ён стаў адным з тых, хто заклікаў беларусаў актыўна пратэставаць супраць дэкрэту № 3, так званага антыдармаедскага дэкрэту.
Міколу Статкевіча затрымалі 31 траўня 2020 года, па дарозе на пікет для збору подпісаў за вылучэнне кандыдаткай на прэзідэнцтва Святланы Ціханоўскай.
Мікола Статкевіч – адзін з больш як шасці сотняў палітзняволеных, якія ўтрымліваюцца ў беларускіх турмах і СІЗА.
