Разгром кватэры Дудзінскага і справа на падлеткаў за сарваныя сцягі. Рэпрэсіі за 12 ліпеня
«Белсат» працягвае расказваць пра рэпрэсіі беларусаў, якія чыніць рэжым Лукашэнкі. Сабралі факты пераследу, пра якія стала вядома 12 ліпеня.
У Менску падлеткі – навучэнцы каледжаў 16-17 гадоў – сарвалі два дзяржаўных сцяга і кінулі на зямлю. У дачыненні да іх распачалі крымінальную справу па арт. 370 КК («Здзек з дзяржаўных сімвалаў»). «Маладыя людзі ўбачылі краму, на фасадзе якой знаходзіўся дзяржаўны сцяг. Падлеткі сарвалі сцяг і кінулі яго на зямлю. Праз некалькі хвілінаў яны сарвалі сцяг з фасада яшчэ аднаго будынку», – паведамляе Следчы камітэт.
Сілавікі пахваліліся тым, як разграмілі кватэру журналіста Дзяніса Дудзінскага. Яны зламалі мэблю, раскідалі рэчы і засунулі ва ўнітаз нацыянальны беларускі і ўкраінскі сцягі.
Сталі вядомыя падрабязнасці суду над Паўлам Мажэйкам і Юліяй Юргілевіч, які распачаўся 10 ліпеня. Следства сцвярджае, што Юлія расказала ў тэлефоннай размове Паўлу пра сваё звальненне з адвакатуры і пра прысуд Алесю Пушкіну. Пракурор спрабуе даказаць, што менавіта Павел «размясціў» гэтую інфармацыю на старонцы тэлеканалу «Белсат», прызнанага беларускімі ўладамі «экстрэмісцкім фармаваннем» – у нявызначаны час, нявызначаным спосабам, праз нявызначаных асобаў. Перадачу звестак «Белсату» следчыя расцанілі гэта як «спрыянне экстрэмісцкай дзейнасці» (ч. 2 арт. 361 КК).
Юргілевіч заявіла, што яе трымаюць у «скоцкіх умовах» і ёй не далі азнаёміцца са справай. Да суда фігуранты адмовіліся даваць паказанні, у судзе Мажэйка адказвае на пытанні выбарачна. Бацька журналіста адмовіўся сведчыць супраць свайго сына.
Журналістцы польскага інфармагенцтва PAP Юстыне Прус забаранілі ўезд у Беларусь на 5 гадоў. Яна працавала ў краіне з 2016 году і цягам усяго гэтага перыяду яна мела акрэдытацыю пры МЗС. Журналістка знаходзілася ў Беларусі падчас масавых пратэстаў пасля прэзідэнцкіх выбараў 2020 году, а таксама асвятляла міграцыйны крызіс, які пачаўся ў 2021 годзе.
У Пружанах за каментары затрымалі Яўгена Пеляхата наўпрост на працы, а пасля вывелі ў кайданках і з мяшком на галаве. З ім з’явілася «пакаяннае» відэа. Паводле інфармацыі берасцейскіх праваабаронцаў, мужчыну затрымаў ГУБАЗіК яшчэ 1 чэрвеня. Цяпер ён ў СІЗА чакае суда. Яго абвінавачваюць паводле арт. 130 КК («Распальванне варожасці») і арт. 368 КК за абразу Лукашэнкі.
Справа палітзняволенага Арцёма Лябедзькі хутка будзе перададзена ў суд. Пра гэта «Народнай Волі» распавёў ягоны бацька Анатоль Лябедзька.
«Следства па справе сына ўжо завершана, і ў хуткім часе яна будзе перададзена ў суд. Для мяне абсалютна відавочна, што гэтая справа – палітычная. Наколькі вядома, большасці тых, каго абвінавачвалі ў фінансаванні экстрэмісцкай дзейнасці, давалі магчымасць выплаціць штрафную кампенсацыю», – распавёў Анатоль Лябедзька.
У Беларусі новае «экстрэмісцкае фармаванне» – тэлеграм-канал «Каратели Молодечно». Такое рашэнне прынятае МУС 7 ліпеня. Пазначана, што ў склад «фармавання» таксама ўваходзіць тэлеграм-канал «Каратели и прикорытники Пинска».
Алена Рувіна belsat.eu
