Урад Літвы прызнаў дамову паміж «Літоўскай чыгункай» і «Беларуськаліем» такой, што не адпавядае нацыянальным інтарэсам, паведамляе DELFI.
У сераду ўрад ухваліў выснову спецыяльнай камісіі, у якой пагадненне паміж «Літоўскай чыгункай» і «Беларуськаліем», што стала прычынай скандалу, было ацэненае як не адпаведнае інтарэсам нацыянальнай бяспекі Літвы.
Да 1 лютага павінны спыніцца перавозкі ўгнаенняў чыгуначным транспартам, бо для гэтага ўжо няма прававой базы.
У снежні дырэктара «Літоўскай чыгункі» звольнілі праз скандал з «Беларуськаліем». Была гаворка, што праз транспартаванне тавару падсанкцыйнага «Беларуськалію» ў адстаўку можа пайсці і ўвесь урад Літвы.
Раней грузы «Беларуськалію» прыбралі са стратэгічных кірункаў, а бюджэт на 2022 год разлічылі без грузаў з «Беларуськалію». Але, сцвярджае кіраўніцтва чыгункі, цалкам спыніць грузаперавозкі падсанкцыйнай кампаніі можна толькі пры наяўнасці неабходнай прававой базы, якой цяпер бракуе.
МГМ, belsat.eu