Раніцай 10 кастрычніка, падчас масіраванага ракетнага абстрэлу Украіны як мінімум тры расейскія ракеты праляцелі над тэрыторыяй суседняй Малдовы. Аб гэтым на сваёй старонцы ў Twitter паведаміў віцэ-прэм’ер і міністр замежных спраў Малдовы Ніку Папеску.
«Тры крылатыя ракеты, запушчаныя сёння раніцай па Украіне з расейскіх караблёў у Чорным моры, перасеклі паветраную прастору Малдовы. Я даручыў выклікаць для тлумачэнняў пасла Расеі», – паведамляе Папеску.
Ракеты былі выпушчаныя з акваторыі Чорнага мора і праляталі над такімі малдаўскімі гарадамі, як Рыбніца, Фларэшты і Сарокі, гаворыцца ў паведамленні МЗС Малдовы.
«Рэспубліка Малдова лічыць гэты інцыдэнт надзвычай сур’ёзным і сумным, які, несумненна, выклікае дадатковую напружанасць. Парушэнне нашай нацыянальнай паветранай прасторы зусім недапушчальна. Бамбаванні суседняй краіны павінны быць неадкладна спыненыя», – заявілі ў МЗС.
Таксама выказалася наконт сённяшніх абстрэлаў Украіны і прэзідэнт Малдовы Мая Санду: «Рашуча асуджаю масіраваны ракетны ўдар па ўкраінскіх гарадах, уключаючы Кіеў. Варварства, тэрарызм і забойства нявіннага грамадзянскага насельніцтва павінна неадкладна спыніцца», – напісала яна.
Алена Рувіна belsat.eu