«Украіна не здалася, не здаецца і не здасца». У Турцыі прайшлі перамовы кіраўнікоў МЗС Расеі і Украіны
10 сакавіка ў Турцыі адбыліся перамовы міністраў замежных справаў Украіны, Турцыі ды Рф – Дмытра Кулэбы, Мэўлюта Чавушаглу і Сяргея Лаўрова.
Па выніках перамоваў кіраўнік МЗС Украіны Кулэба заявіў, што гатовы працягнуць сённяшні фармат перамоваў з Лаўровым, калі расейскі бок будзе гатовы да сурʼёзнай і прадметнай размовы, «а не паўтарэння шырока распаўсюджаных прапагандысцкіх штампаў і наратываў пра Украіну», піша УНІАН.
Кулэба таксама заявіў, што Кіеў не можа спыніць вайны, калі ў краіны-агрэсара няма жадання гэтага рабіць. Падчас перамоваў ён пачуў, што спыненне агню прывязанае РФ да выканання патрабаванняў, вылучаных прэзідэнтам РФ Уладзімірам Пуціным на адрас Украіны.
«У сувязі з гэтым я хачу пацвердзіць яшчэ раз, што Украіна не здалася, не здаецца і не здасца. Мы гатовыя да дыпламатыі, мы шукаем дыпламатычныя рашэнні, але пакуль іх няма, мы будзем самааддана, ахвяруючы сабой, абараняць нашую зямлю, нашых людзей ад расейскай агрэсіі», – падкрэсліў міністр.
Пры гэтым палітык спадзяецца, што па выніках перамоваў пачне працаваць гуманітарны калідор з і ў Марыупаль. Кулэба спадзяецца, што РФ асабліва з чалавечых меркаванняў і з чалавечай спагады да тых, хто пакутуе ад яе бомбаў, дазволіць функцыянаванне гуманітарнага калідору.
Лаўроў прызнаў атаку на радзільню
У сваю чаргу міністр замежных справаў РФ Сяргей Лаўроў пацвердзіў, што ініцыятыва штодзённа адкрываць гуманітарныя калідоры застаецца ў моцы. Паводле яго, расейская «спецаперацыя» ва Украіне ідзе паводле плану, а перамовы з Украінай у Беларусі безальтэрнатыўныя, піша «Коммерсантъ».
Таксама Лаўроў сказаў, што РФ не плануе нападаць на іншыя краіны:
«На іншыя краіны мы нападаць не плануем, мы і на Украіну не нападалі».
Пры гэтым пацвердзіў, што расейскія войскі свядома атакавалі радзільню ў Марыупалі: той «даўно захоплены батальёнам «Азоў» ды іншымі радыкаламі».
Паводле Лаўрова, з эканамічнымі праблемамі Расея «сама разбярэцца» і выйдзе з крызісу без «ілюзіяў, што Захад можа быць надзейным партнёрам».
ПС belsat.eu
