У Радзе бяспекі ААН разгледзелі пяты варыянт рэзалюцыі пра вайну паміж Ізраілем і «Хамасам». Дакумент аб неадкладным спыненні агню прапанавалі Аб’яднаныя Арабскія Эміраты. Рэзалюцыя набрала неабходную колькасць галасоў, каб быць ухваленай, аднак ЗША скарысталіся правам вета, піша «The Associated Press».
Варыянт, прапанаваны Аб’яднанымі Арабскімі Эміратамі, падтрымалі 13 краінаў, у тым ліку Францыя і Японія, адна дзяржава – Вялікая Брытанія – устрымалася, супраць былі толькі Злучаныя Штаты Амерыкі, якія ўжылі права вета. «Адасобленая пазіцыя Злучаных Штатаў адлюстроўвае рост рознагалоссяў паміж Вашынгтонам і некаторымі найбліжэйшымі хаўруснікамі», – адзначае «The Associated Press».
Намеснік амбасадара ЗША Робэрт Ўуд назваў рэзалюцыю незбалансаванаю, адзначыўшы, што дакумент не асуджае нападу «Хамасу» на Ізраіль:
«На жаль, амаль усе нашыя рэкамендацыі былі праігнараваныя. Вынікам гэтага паспешнага працэсу была незбалансаваная рэзалюцыя, адарваная ад рэальнасці».
Паводле дыпламата, прапанаваны варыянт не прывядзе да трывалага міру, а толькі «пасее насенне новай вайны».
Намеснік расейскага амбасадара ў ААН Дзмітрый Палянскі назваў пазіцыю ЗША «цвердалобай і эгаістычнай» ды заявіў, што яе вынікам становяцца «могілкі палестынскіх дзяцей».
«Вы апыняцеся на няправільным баку гісторыі, падтрымаўшы бесчалавечныя варварскія дзеянні», – заявіў прадстаўнік Расеі, якая блакуе рэзалюцыі Рады бяспекі пра развязаную гэтай дзяржавай вайну ва Украіне, падкрэслівае Бі-Бі-Сі.
Рашэнне ЗША раскрытыкаваў і Кітай, а амбасадар Ізраілю ў ААН Гіляд Эрдан падзякаваў прэзідэнту Джо Байдэну за тое, што Вашынгтон «цвёрда стаіць на нашым баку». Паводле дыпламата, рэзалюцыя «дазволіць тэрарыстам «Хамасу» заставацца ва ўладзе ў Газе, не асуджае «Хамасу» і не заклікае да вызвалення закладнікаў». «Спыненне агню будзе магчымае толькі пасля вяртання ўсіх закладнікаў і знішчэння «Хамасу», – падсумаваў прадстаўнік Ізраілю.
Гэта ўжо пяты варыянт рэзалюцыі пра вайну на Блізкім Усходзе, які разгледзелі ў Радзе бяспекі ААН. Усе яны былі адхіленыя.
Сцяпан Кубік belsat.eu