У Міністэрства абароны Беларусі 9 лістапада выклікалі вайсковага аташэ пры амбасадзе Польшчы ў Менску Яраслава Кемброўскага, паведамляе тэлеграм-канал ведамства.
Паведамляецца, што да польскага ваеннага прадстаўніка была даведзена інфармацыя ў дачыненні да «беспадстаўных і неправамерных абвінавачанняў польскага боку ў датычнасці беларускіх вайскоўцаў да міграцыйнага крызісу на польска-беларускай мяжы» і што для такіх сур’ёзных прэтэнзій патрабуюцца «важкія доказы».
Таксама беларускі бок выказаў незадаволенасць знаходжаннем на польска-беларускай мяжы такой колькасці польскіх сілавікоў.
«Міністэрства абароны Рэспублікі Беларусь занепакоенае павелічэннем колькасці польскіх вайскоўцаў каля нашых межаў, а таксама адсутнасцю абʼектыўнай аргументацыі іх знаходжання».
Нагадаем, з раніцы 8 лістапада ў бок памежнага пераходу «Брузгі-Кузніца» прыйшлі каля двух тысяч мігрантаў з заплечнікамі, якіх кантралявалі ўзброеныя людзі ў камуфляжы. Каля мяжы сілавікі скіравалі людзей у лес, дзе групы мігрантаў спрабавалі разбурыць плот і прарвацца праз мяжу. На другім баку знаходзяцца польскія памежнікі, якія не прапускаюць мігрантаў.
Бліжэй да вечара мігранты развярнулі намётавы лагер, дзе знаходзяцца дагэтуль, іх кантралююць узброеныя беларускія памежнікі. У ноч на 9 лістапада ніякіх правакацый на мяжы не было. Польскі бок кажа, што на мяжы знаходзіцца каля 3-4 тысяч мігрантаў.
АД belsat.eu