Папа Рымскі Францішак 8 верасня прыняў апостальскага нунцыя ў Беларусі, арцыбіскупа Антэ Ёзіча. Пра гэта паведамляе Vatican News.
Сустрэча адбылася ў ватыканскім Апостальскім палацы. Аб змесце размовы падчас аўдыенцыі нічога не паведамляецца.
Выданне «Позірк» адзначае, што да гэтага папа Францішак сустракаўся з Ёзічам каля года таму – 1 верасня 2022-га. Тады падрабязнасці аўдыенцыі таксама не раскрываліся.
Нагадаем, у канцы чэрвеня Беларусь наведаў спецыяльны пасланнік Папы Рымскага арцыбіскуп Кляўд’ё Гуджэроцці. Апроч удзелу ў рэлігійных падзеях, ён актыўна сустракаўся з прадстаўнікамі лукашэнкаўскага рэжыму. У прыватнасці, з міністрам замежных справаў Сяргеем Алейнікам, упаўнаважаным у справах рэлігіяў і нацыянальнасцяў Аляксандрам Румакам і старшынёй Менскага аблвыканкаму Аляксандрам Турчынам. Але асабіста з Аляксандрам Лукашэнкам Гуджэроцці не сустракаўся.
З тым візітам Гуджэроцці было звязана шмат чаканняў. Паводле крыніцаў «Белсату», Ватыкан імкнуўся дамагчыся саступак – вярнуць Чырвоны касцёл або вызваліць хаця б некалькі палітычных вязняў. Але замест гэтага на саступкі пайшоў Каталіцкі касцёл, у прыватнасці ў пытанні адстаўкі пробашча архікатэдры Клімантовіча, а рэпрэсіі ў дачыненні каталікоў у Беларусі толькі ўзмацніліся.
Глеб Нержын belsat.eu
