Як паведамляе «Гомельская Вясна», 8 верасня ў судзе Цэнтральнага раёну Гомля адбыўся яшчэ адзін суд над гомельцам Міхаілам Лапуновым.
Гэта быў ужо трэці запар суд над Лапуновым. Як і ў абодва папярэднія разы, 8 верасня бацьку палітзняволенага судзілі паводле ч. 2 арт. 19.11 («Распаўсюд экстрэмісцкіх матэрыялаў»). Кіравала судовым працэсам суддзя Алеся Восіпава.
Праваабаронцы пакуль не ведаюць, якое рашэнне вынес суд.
Нагадаем, Міхаіла Лапунова ўжо двойчы каралі 15 соднямі арышту. Калі і апошні суд скончыўся такім жа самым выракам – мужчына павінен будзе правесці ў ІЧУ 45 содняў запар.
Сын Міхаіла – Мікіта Залатароў – адзін з наймалодшых затрыманых пасля пратэстаў 2020 года. На той момант 16-гадовага Мікіту, хворага на эпілепсію, абвінавацілі ажно паводле трох артыкулаў Крымінальнага кодэксу і асудзілі на 5 гадоў выхаваўчай калоніі. Пазней на хлопца завялі яшчэ адну крымінальную справу – за тое, што ён нібыта напаў на супрацоўніка СІЗА і пагражаў ягоным родным. Агульны тэрмін пакарання для Мікіты склаў 4 гады і 6 месяцаў зняволення.
Глеб Нержын belsat.eu
