Пяць амерыканскіх абарончых кампаніяў трапілі пад санкцыі Кітаю за продаж зброі Тайваню, паведамляе «Bloomberg». Пры гэтым у самым Кітаі затрымалі чалавека, абвінавачанага ў шпіянажы на карысць Вялікай Брытаніі, піша «South China Morning Post».
Кітайскія санкцыі ўведзеныя ў дачыненні амерыканскіх кампаніяў «BAE Systems Land and Armament», «Aliant Techsystems Operation», «AeroVironment», «ViaSat» і «Data Link Solutions». Улады КНР замарозілі ўсе віды маёмасці гэтых фірмаў на сваёй тэрыторыі, а таксама забаранілі стасункі з імі для кітайскіх кампаніяў і прыватных асобаў.
У кітайскім МЗС патлумачылі ўвядзенне санкцыяў тым, што ЗША ўводзяць «незаконныя аднабаковыя санкцыі» супраць кампаніяў і асобаў з Кітаю, а таксама «пагражаюць міру і стабільнасці ў Тайванскай пратоцы». Пекін заклікаў Вашынгтон выконваць палітыку «аднаго Кітаю» і паабяцаў адказаць «рашучым і сілавым супрацьдзеяннем» у выпадку далейшага ўзбраення Тайваню і новых санкцыяў супраць кітайскіх фірмаў.
Тым часам Міністэрства дзяржаўнай бяспекі КНР заявіла пра затрыманне замежнага кансультанта, які, як заяўляецца, збіраў сакрэтныя звесткі для брытанскай выведкі MI6. Паводле ведамства, ён дзеяў у інтарэсах MI6 з 2015 года, а брытанская выведка трэнавала яго і забяспечвала адмысловым абсталяваннем. Акрамя паездак у Кітай для збору сакрэтных звестак, кансультант дапамагаў MI6 вербаваць іншых шпіёнаў.
«South China Morning Post» удакладняе, што Міністэрства дзяржбяспекі КНР упершыню выступае з такімі абвінавачваннямі на адрас MI6. Раней аналагічныя заявы гучалі на адрас Цэнтральнага выведнага кіраўніцтва ЗША (CIA).
На 2024 год да звыклых папярэджанняў пра магчымы напад Кітаю на Тайвань усё часцей дадаюцца папярэджанні пра кітайскія прэтэнзіі на амаль усё Паўднёва-Кітайскае мора (бо некалі Кітай проста намаляваў на мапе дзевяць рысак і заявіў: «Маё»). Кітай ужо вінаваціць Філіпіны ў правакацыях, мае прэтэнзіі таксама да Малайзіі ды В’етнаму.
Якуб Хруст belsat.eu