«Нават з анальгетыкамі людзі курчацца ад болю». Як працуе шпіталь у Бахмуце, дзе ратуюць жыцці
Украінскі горад Бахмут у Данецкай вобласці – месца, дзе на гэты момант трываюць адныя з найбольш жорсткіх і крывавых баёў. Некаторыя медыі звязваюць абстрэлы гораду са своеасабліваю помстаю за выхад расейскіх войскаў з Херсону. Дадатковы фактар – размяшчэнне Бахмуту: гэта важны транспартавы вузел як для ўкраінскай, гэтак і для расейскай арміі, ад яго ідзе дарога да буйных гарадоў Данбасу, у прыватнасці Славянску і Краматорску.
Фатограф «Белсату» паназіраў за тым, як працуе гарадскі шпіталь, куды штодня дастаўляюць параненых.
Увага! Здымкі ніжэй могуць вас шакаваць.
«Гэтае месца – стабілізацыйны пункт, сюды прывозяць параненых з поля бою. На фронце ім надаюць першую медычную дапамогу, а ўжо тут, у прыфрантавым шпіталі, іх аглядаюць і стабілізуюць медыкі, рыхтуюць да транспартавання ў больніцу. Пакуль быў у гэтым шпіталі, рух не спыняўся ні на хвіліну: адных вывозяць, іншых прывозяць, проста людзей пад рукі водзяць. Адным словам – канвеер: пасадзілі, паклалі, апрацавалі раны, праверылі стан і адправілі далей», – дзеліцца ўражаннямі фатограф.
«Прывозяць сюды не толькі вайскоўцаў, але і цывільных. Гэтак, прывезлі траіх жыхароў гораду Часаў Яр, што недалёка ад Бахмуту. Хоць і ўсім даюць анальгетыкі, бывае, што чалавек проста курчыцца ад болю, так было з асобай, якой прастрэлілі лёгкае», – распавядае карэспандэнт.
Як паведаміла Бі-Бі-Сі 4 снежня, каля Бахмуту, дзе трываюць цяжкія баі, загінулі пяцёра грузінскіх добраахвотнікаў, якія ваявалі ў складзе ЗСУ. Горад застаецца пад кантролем Кіева, нягледзячы на спробы расейскага войска яго захапіць.
Паводле Генеральнага штабу Збройных сілаў Украіны, на дзень 5 снежня падраздзяленні ПВА адбілі атакі расейскіх войскаў у раёнах некалькіх мясцовасцяў Луганскай вобласці і шмат якіх месцах Данецкай вобласці, у тым ліку каля Бахмуту.
«У Бахмуце ідуць найбольш жорсткія і крывавыя баі. Яны спачатку праходзяць усімі сродкамі паразы, а потым разбіваюцца на маленькія групы па 10–15 чалавек і спрабуюць пракрасціся ў нашы баявыя парадкі, але воіны трымаюцца», – паведаміў спікер Усходняй групоўкі ЗСУ Сяргей Чэрэваты ў эфіры нацыянальнага марафону.
Паводле апошніх звестак на раніцу 6 снежня, Бахмут абстралялі з танкаў і ўсяго спектру артылерыі. Таксама на бахмуцкім і аўдзееўскім кірунках праціўнік працягвае наступаць, актыўна выкарыстоўваючы авіяцыю для падтрымання дзеянняў сваіх наземных груповак.
«Праціўнік не спыняе абстрэлаў мясцовасцяў і пазіцыяў нашых падраздзяленняў уздоўж лініі судакранання, вядзе паветраную выведку», – паведамілі ў Генштабе ЗСУ.
Агата Квяткоўская belsat.eu
