Следчы камітэт распачаў чарговую крымінальную справу супраць працаўнікоў «Тут Бай Медыя» ды іншых асобаў. Пакуль падрабязнай інфармацыі пра новую справу афіцыйна не агучваюць. Прадстаўнікі кампаніі думаюць, што абвінавачанне могуць выставіць затрыманым у траўні працаўнікам TUT.by.
Следчы камітэт распачаў крымінальную справу паводле ч. 3 арт. 130 КК («Распальванне расавай, нацыянальнай, рэлігійнай або іншай сацыяльнай варажнечы або розні, учыненае групай асобаў) супраць TUT.by. Афіцыйна паведамляюць, што крымінальную справу распачалі ў дачыненні падатковых асобаў, працаўнікоў «Тут Бай Медыя» ды іншых асобаў. Падрабязнасцяў следчыя агучваць не жадаюць.
«Мы спрабавалі скантактавацца з афіцыйным прадстаўніком СК Сяргеем Кабаковічам, але ён адмовіўся даць хоць якую дадатковую інфармацыю, акрамя той, якую агучылі раней. Ён не назваў прозвішчаў, каго вінавацяць паводле гэтай справы і не сказаў нават, колькі асобаў праходзяць у новай справе. Мы разумеем, што завялі справу паводле ч. 3 арт. 130 КК. Але выстаўлення абвінавачванняў, наколькі нам вядома, яшчэ не было. Таксама, наколькі нам вядома, за апошнія месяцы не было аніякіх следчых дзеянняў, у тым ліку і паводле гэтай справы. Таму насамрэч складана нешта каментаваць, хто абвінавачаны, супраць каго завялі справу. У нас недастаткова інфармацыі, каб стварыць карціну», – распавяла «Белсату» менеджарка zerkalo.io Аляксандра Пушкіна.
Пакаранне паводле арт. 130 прадугледжвае да 12 гадоў пазбаўлення волі. Аляксандра Пушкіна кажа, абвінавачанне могуць выставіць затрыманым раней працаўнікам TUT.by:
«Пасля экспертызы аб прызнанні матэрыялаў нашага рэсурсу экстрэмісцкім, можна быць гатовымі і да такіх версіяў, але гэта шакавальная сітуацыя. Паводле гэтага артыкулу праходзяць Раман Пратасевіч, Сяргей Ціханоўскі. І TUT.by, атрымліваецца, стаў у адную лінейку, займаючыся незалежнаю журналістыкаю».
Цяпер у «справе TUT.by» за кратамі застаюцца 11 асобаў. Працаўнікоў кампаніі вінавацяць ва ўхіленні ад выплаты падаткаў у асабліва буйным памеры.
18 траўня ў менскім і рэгіянальным офісах TUT.by, а таксама ў працаўнікоў выдання адбыліся ператрусы. У Камітэце дзяржаўнага кантролю заявілі, што ў дачыненні службовых асобаў «Тут Бай Медыя» распачалі крымінальную справу паводле ч. 2 арт. 243 КК («Ухіленне ад выплаты падаткаў у асабліва буйным памеры»). Дамен парталу TUT.by заблакавалі на ініцыятыву Генеральнай пракуратуры. Фармальнаю прычынаю блакавання сталася размяшчэнне інфармацыі ад імя фонду салідарнасці «BySol», які дапамагае рэпрэсаваным беларусам.
Сузаснавальнік TUT.by Кірыл Валошын назваў блакаванне парталу і арышт людзей «актам забойства ненавіснага ўладай выдання, якое заўсёды шчыра і хутка публікавала інфармацыю пра тое, што адбываецца ў краіне».
Пасля блакавання дамену TUT.by ГУБАЗіК заявіў, што «дзеянні інфармацыйнага рэсурсу TUT.by у інфармацыйным забеспячэнні пратэстаў, стварэнні магчымасці выступаць з дэструктыўнымі заклікамі наносяць шкоду нацыянальным інтарэсам Рэспублікі Беларусь у палітычнай, сацыяльнай, інфармацыйнай сферах і, такім чынам, нацыянальнай бяспецы Рэспублікі Беларусь». У суд паступіла позва аб прызнанні TUT.by экстрэмісцкім.
У ліпені былая каманда TUT.by стварыла сайт zerkalo.io. Але літаральна з моманту яго з’яўлення рэсурс заблакавалі ў Беларусі. Цяпер сайт даступны толькі з дапамогаю VPN.
13 жніўня суд Цэнтральнага раёну Менску прызнаў інфармацыйную прадукцыю парталаў TUT.by і парталу Zerkalo.io «экстрэмісцкімі матэрыяламі», піша Zerkalo.io.
«Экстрэмісцкаю» прызналі як матэрыялы на сайтах, так і допісы ў Telegram, TikTok, Twitter, Viber, «Одноклассниках» і «УКантакце», а таксама лагатыпы TUT.by і Zerkalo.io.
СК belsat.eu