7 ліпеня стала вядома, што яшчэ 6 траўня з віцебскай папраўчай калоніі на волю выйшаў палітвязень Алег Букас, паведамляе тэлеграм-канал @dissidentBY.
Алег Букас – жыхар Бабруйску. Яго разам з бацькам Ігарам Букасам асудзілі паводле арт. 364 КК РБ («Гвалт у дачыненні супрацоўнікаў міліцыі»). Іх абодвух затрымалі 10 жніўня 2020 года. Непадалёк месца, дзе Букасы прыпаркавалі машыну, яны заўважылі іншае аўта і аўта ДАІ. Каля гэтых машынаў нейкая жанчына прасіла адпусціць кіроўцу.
Старэйшы Букас захацеў пацікавіцца, што адбываецца, і падышоў да супрацоўніка ДАІ. Паміж ім і даішнікам здарыўся канфлікт. Калі Алег паспрабаваў заступіцца за бацьку, іх абодвух затрымалі і жорстка збілі.
27 лістапада 2020 года Ігару прысудзілі 4 гады калоніі, а Алегу – 2 гады калоніі.
Нядаўна стала вядома, што Ігару ўзмацнілі рэжым і перавялі ў крытую турму. Цяпер тэрмін палітвязень будзе адбываць у турме № 1 у Горадні.
Падтрымаць Ігара Букаса можна па адрасе: Турма № 1, вул. Кірава, 1, 230023, г. Горадня.
Марыя Міхалевіч belsat.eu
