Былы палітвязень Аляксандр Кабанаў далучыўся да «ByPol». У аб’яднанні ён будзе адказваць за супрацу з медыямі. «У тым ліку буду прадстаўніком «ByPol» у СМІ», – сказаў Кабанаў «Белсату».
Аляксандр Кабанаў узначаліць кірунак працы «ByPol» з медыямі – гэта важны сегмент барацьбы ў сучасных рэаліях, адзначылі ў аб’яднанні колішніх сілавікоў.
У сваім Facebook Кабанаў паведаміў, што гэтую працу яму прапанаваў «ByPol».
«ByPol» вырашыў стварыць медыягрупу, і мне прапанавалі заняцца гэтым. Пасля некаторых абмеркаванняў і дамоўленасцяў даў згоду. Былы палітвязень і былыя супрацоўнікі, з гэтага мусіць нешта атрымацца», – напісаў актывіст.
У каментары «Белсату» Кабанаў удакладніў, што ў ягоных абавязках, сярод іншага, будзе камунікацыя з журналістамі:
«Так, у тым ліку буду прадстаўніком «ByPol» у СМІ. Мая асноўная задача – узаемадзеянне з медыямі».
Аляксандр Кабанаў – берасцейскі блогер і прэс-сакратар ініцыятыўнай групы Святланы Ціханоўскай. Паводле «народнага» артыкула аб групавых дзеяннях, што груба парушаюць грамадскі парадак, яму далі 3 гады калоніі. Цалкам адбыўшы тэрмін, выехаў за мяжу.
У сакавіку стала вядома, што супраць яго ў Беларусі завялі новыя крымінальныя справы. «Ці то экстрэмізм, ці то тэрарызм, ці то здрада дзяржаве, ці то ўсё разам», – казаў Кабанаў «Белсату».
У лютым ён далучыўся да Каардынацыйнай рады, аднак у красавіку пакінуў гэтую структуру.
Сяргей Крот belsat.eu