Міністэрства фінансаў Беларусі паведамляе, што толькі ў студзені гэтага года на ўнутраным рынку было прададзена доўгатэрміновых аблігацыяў на агульную суму 626,17 млн долараў. Гэта больш, чым за ўвесь мінулы год.
Летась Мінфін прадаў на ўнутраным фінансавым рынку дзяржаўныя доўгатэрміновыя аблігацыі на суму 300 млн рублёў і 463,44 млн долараў.
Эксперты фінансавага рынку адзначаюць, што астатнія аблігацыі ў студзені выкупілі беларускія банкі. Такі механізм у Беларусі выкарыстоўваюць, каб падтрымаць складанае фінансавае становішча прамысловых грандаў або рэструктураваць іх пазыкі. На пачатку года ў складанай сітуацыі аказаўся Беларускі металургічны завод.
Паводле інфармацыі TUT.BY, былі падрыхтаваныя праекты дакументаў, згодна з якімі ў 2021 годзе падтрыманне БМЗ будзе аказанае з бюджэту. Плюс існуюць дамоўленасці з банкамі аб рэфінансаванні запазычанасці. Але «такі падыход» ужо пачынае надакучваць некаторым банкам, кажуць суразмоўцы.
Пазначаючы маштабы праблемы, Нацбанк адзначаў, што шэраг дзяржаўных прадпрыемстваў – буйнейшых крэдытаатрымальнікаў маюць абмежаваныя магчымасці для самастойнага абслугоўвання пазыкі. Аб’ём запазычанасці такіх прадпрыемстваў ацэньваецца Нацыянальным банкам на ўзроўні каля 14 % да ВУП.
МГ belsat.eu
