Лукашэнка распавёў, што Пуцін паабяцаў яму прысвоіць званне палкоўніка расейскай арміі
Аднак пакуль гэтае абяцанне Уладзімір Пуцін не выканаў, кажа Аляксандр Лукашэнка.
У інтэрвʼю расейскаму прапагандысту Уладзіміру Салаўёву Лукашэнка заявіў, што цяпер ён мае званне падпалкоўніка. «Пуцін – палкоўнік. Абяцаў мне палкоўніка прысвоіць. Да гэтага часу не прысвоіў», – дадаў Лукашэнка.
Гэтыя словы выклікалі смех у Салаўёва
– Палкоўніка каго можа прысвоіць Пуцін? – удакладніў прапагандыст.
– Расейскай арміі, – адказаў Лукашэнка.
– Ну як вы сабе ўяўляеце, што прэзідэнт незалежнай Беларусі зʼяўляецца палкоўнікам расейскага войска? – працягваў смяяцца Салаўёў.
– Ну і што? Гэта ж мая праблема, не ваша. Паабяцаў – рабі.
– Але вы ж у расейскім войску і не служылі. Вы служылі ў савецкай арміі…
– У савецкай. Яна была і расейскай, і беларускай. Прысвой мне званне палкоўніка савецкага войска.
– Ну, савецкай таксама не можа. Бо тады будуць казаць: «Вось, мы казалі, што Пуцін хоча аднавіць Савецкі Саюз».
– Ну і добра. Ну і што?! Няхай хоча. І што?! Ну што тут такога? А што яму забараніць жадаць?..
РР belsat.eu
