З Беларускай дзяржаўнай філармоніі пасля 13 гадоў працы звольнілі кампазітарку Ларысу Сімаковіч, паведамляе «Радыё Свабода».
Звальненне адбылося нібыта з прычыны «узросту». Ларысе 64 гады, але яна цалкам выконвала сваю працу і да яе не было пытанняў.
Апошні працоўны дзень у Ларысы Сімаковіч быў 31 кастрычніка: яна выйшла на сцэну, дзе гучаў яе новы твор – космамістэрыя «Край». Двума днямі раней, у пятніцу 29 кастрычніка, ёй аддалі працоўную кніжку.
Намеснік гендырэктара філармоніі Андрэй Лапцёнак паведаміў, што з ёй не працягваюць кантракт «па ўзросце».
«У мяне скончыўся кантракт, які раней працягвалі некалькі гадоў без праблем. І раптам нечакана, хоць я магу здагадвацца пра нейкія рэальныя прычыны, намеснік гендырэктара сказаў, што «па прычыне ўзросту». Калі я запыталася, ці ёсць да мяне прафесійныя пытанні, намеснік адказаў упэўненым «Не!», – распавяла Сімаковіч.
За ўвесь час працы ў філармоніі яна паставіла 11 спектакляў, адкрыла новыя жанры для беларускага харавога мастацтва і ўсе працы рабіла выключна на беларускай мове.
Таксама яна з’яўлялася мастацкім кіраўніком фальклорнага тэатру «Госьціца».
АД, belsat.eu
