У Менску збіраюцца адрамантаваць 90 супрацьрадыяцыйных і 23 звычайных сховішчы ў 2024 года. Гэта вынікае з «Плана правядзення рамонтаў ахоўных збудаванняў грамадзянскай абароны», які каманда «BELPOL» перадала «Позірку».
Больш за ўсё супрацьрадыяцыйных сховішчаў, якія плануюць рэмантаваць, размешчана ў Партызанскім (23), Ленінскім (20) і Цэнтральным (18).
90% супрацьрадыяцыйных сховішчаў знаходзяцца на балансе ўнітарнага прадпрыемства «Спецпрадпрыемства Мінгарвыканкама». На сваім сайце кампанія паведамляе, што гэта «прадпрыемства па захоўванні, рамонце і тэхнічным абслугоўванні маёмасці і збудаванняў грамадзянскай абароны», якое «вядзе сваю дзейнасць больш за 30 гадоў». Таксама яно «прапануе вялікую наменклатуру абсталявання для ахоўных збудаванняў, супрацьпажарнага абсталявання, металавырабаў і прадукцыі швейнай вытворчасці».
Спецпрадпрыемства мае сродкі індывідуальнай і калектыўнай абароны, вентылятары, дзверы, аканіцы і інш.
Яшчэ па два супрацьрадыяцыйныя сховішчы абслугоўваюць Белдзяржуніверсітэт і ААТ «Камволь», па адным – ААТ «Кірмаш», Менскі гарадскі цэнтр нерухомасці, дэпартамент аховы МУС, гімназія № 41 і інтэрнат Беларускага цеплаэнергетычнага інстытуту.
У 2015 годзе ў Менску ў дзеючым стане было больш за 1000 ахоўных збудаванняў, распавядаў прадстаўнік сталічнага ўпраўлення МНС. Найбольш буйныя з іх былі на балансе «МАЗ».
Арсен Рудэнка belsat.eu
