Жаночая камера на Акрэсціна, дзе ўтрымліваюць журналістку Ірыну Слаўнікаву, абвесціла галадоўку

Галадаваць вязні пачалі на знак пратэсту супраць жорсткіх умоваў утрымання. У гэтай жа камеры ўтрымліваюць і нашую калегу Ірыну Слаўнікаву. Пра гэта распавялі жанчыны, якія ўжо адбылі арышт і выйшлі, піша Zerkalo.io.

Жанчынам, якія адбываюць адміністратыўны арышт у ізалятары на Акрэсціна, не даюць перадачаў. У іх забралі нават зубныя шчоткі і лекі, што засталіся пасля сукамерніц, якія вызваліліся. Прычынаю стала тое, што вязні «не тым тонам папрасілі ў адміністрацыі туалетную паперу», распавяла адна з ужо былых сукамерніц Ірыны Слаўнікавай. Жанчына таксама сказала, што ў двухмясцовай камеры, дзе сядзіць Ірына, утрымліваюцца 11 чалавек. Ёсць сярод іх і бесхацінка.

Ірыну Слаўнікаву разам з мужам Аляксандрам Лойкам затрымалі ў ноч на 31 кастрычніка ў менскім аэрапорце: яны вярталіся з адпачынку ў Егіпце. Абаім прызначылі 15 содняў за нібыта распаўсюд экстрэмісцкіх матэрыялаў.

ГГ, belsat.eu