У Беларусі засталося не больш за тысячу вагнэраўцаў, паведамляе Мінабароны Вялікай Брытаніі
У міністэрстве абароны Вялікай Брытаніі мяркуюць, што ў Беларусі засталося не больш за тысячу наймітаў ПВК Вагнэра. Яны навучаюць сілавікоў, і, паводле ведамства, ім наўрад ці даручаць іншую працу.
«Імаверна, у Беларусі засталося менш за тысячу наймітаў ПВК Вагнэра. Яны знаходзяцца ў краіне з чэрвеня 2023 года, калі іх налічвалася 8 тысячаў», – паведаміла Мінабароны Злучанага Каралеўства ў чарговай справаздачы, прысвечанай вайне ва Украіне.
Ведамства называе Аляксандра Лукашэнку прэзідэнтам і адзначае, што наўрад ці ён будзе выкарыстоўваць баевікоў «за межамі іх цяперашняй кампетэнцыі»:
«Яны ўдзельнічаюць у рыхтаванні вайскоўцаў МУС, але малаімаверна, што яны будуць браць непасрэдны ўдзел у падтрыманні ўнутранай або памежнай бяспекі Беларусі».
Пры гэтым, як падкрэслівае Мінабароны Вялікай Брытаніі, прысутнасць вагнэраўцаў у нашай краіне – на карысць расейцам, бо Украіна вымушаная трымаць войска на мяжы з Беларуссю на выпадак «магчымага будучага ўварвання».
Надоечы такую ж ацэнку даваў прадстаўнік Аб’яднанага пераходнага кабінету Валерый Сахашчык. Напачатку студзеня ён казаў, што бальшыня наймітаў дасюль жыве ў лагеры ў вёсцы Цэль Асіповіцкага раёну. Паводле яго, некалькі дзясяткаў баевікоў атрымалі беларускія пашпарты са змененымі імёнамі і датамі нараджэння і падпісалі кантракты з унутранымі войскамі МУС.
Прапагандысцкія крыніцы рэгулярна паведамляюць пра трэнаванні, што ладзяць вагнэраўцы з беларускімі сілавікамі. На гэтым тыдні Telegram-канал унутраных войскаў адсправаздачыўся, што баевікі пачалі рыхтаваць снайпераў.
Сцяпан Кубік belsat.eu
