Менскі гарадскі суд 3 снежня вынес прысуд палітзняволенай Вользе Залатар, якая была арганізатаркай чаяванняў і канцэртаў у сваім двары.
Маці пяцярых дзяцей суддзя Анастасія Папко прысудзіла чатыры гады зняволення. Пракурорка Жанна Баранава патрабавала пяць гадоў зняволення.
Вольгу Залатар абвінавацілі паводле двух артыкулаў Крымінальнага кодэксу: ч. 1 арт. 361-1 («Стварэнне экстрэмісцкага фармавання») і ч. 1 і 2 арт. 342 («Арганізацыя і навучанне дзеянням, якія груба парушаюць грамадскі парадак»). Яе трымаюць за кратамі з 18 сакавіка бягучага года.
Яна была адміністратаркай мясцовага дваровага чату і арганізоўвала несанкцыянаваныя масавыя мерапрыемствы: чаяванні, прагулкі, канцэрты.
«У матэрыялах справы маім дзеянням нададзены сэнс, які я не мела на ўвазе. Звычайныя чалавечыя ўчынкі, рэакцыі і пачуцці крыміналізаваныя. У матэрыялах справы ёсць фота плаката, на якім напісана «Мір. Любоў. Свабода». І я падпісваюся пад кожным словам. Я хачу міра для сваёй роднай краіны», – заявіла Вольга Залатар у апошнім слове.
Былы адвакат палітзняволенай Андрэй Мачалаў, якога затым пазбавілі ліцэнзіі, распавёў, што пасля затрымання ў ГУБАЗіКу Вольгу збівалі, выбіваючы паролі ад тэлефона. Адвакаты выявілі ў жанчыны сінякі на руках і шыі, сінякі на ягадзіцах.
Залатар і ейны абаронца падавалі заяву, каб пачалі крымінальнай справы супраць супрацоўніка ГУБАЗіКу Цверацінава за перавышэнне ўлады і службовых паўнамоцтваў (артыкулы 424 і 426 Крымінальнага кодэксу). Але ў крымінальнай справе адмовілі на падставе нібыта адсутнасці ў яго дзеяннях складу злачынства. У СК пастанавілі, што «заявы Залатар аб прычыненні ёй цялесных пашкоджанняў не адпавядаюць рэчаіснасці, бо яны мелі месца да ейнага затрымання».
МГ belsat.eu
