Старшыня Саюзу палякаў у Беларусі Анджэліка Борыс даслала ліст першаму кіраўніку СПБ Тадэвушу Гавіну. Ліст напісаны па-беларуску праз турэмную цэнзуру, хаця, як прызнаецца Борыс, ён прасцей было б пісаць па-польску. Борыс параўноўвае сваю турму з падзеямі 80-гадовай даўніны, калі жыхароў Беларусі, у тым ліку палякаў, высылалі ў Сібір.
«Усюды дзе знаходзілася, я навучала дзяўчат польскай мове, для мяне гэта было вельмі прыемна. Так што апошнія тры месяцы я валанцёр настаўнік», – піша Анджэліка Борыс. Таксама яна адзначае, што атрымоўвае шмат лістоў са словамі салідарнасці, у тым ліку ад беларусаў, якія жывуць у замежжы.
Напрыканцы ліста Борыс перадае прывітанні ўсім сваім сябрам.
Цяпер Анджэліка Борыс утрымліваецца ў СІЗА №1 у Менску, ёй пагражае да 12 гадоў зняволення за «распальванне рэлігійнай і нацыянальнай варажнечы». Праваабарончай супольнасцю яна прызнаная палітычнай зняволенай.